తిరుమలలో చేజారిన బంగారు కడియం.. సీసీ కెమెరాలతో దొరికింది

తిరుమల: నాగుల చవితి నాడు చేజారిన బంగారు కడియం సీసీ కెమెరాల సాయంతో యజమానురాలికి తిరిగి దక్కింది. హైదరాబాద్‌కు చెందిన ఓ భక్తురాలు శ్రీవారి దర్శనానికి వచ్చారు. శుక్రవారం (నవంబరు 13) ప్రసాదం పంపిణీ కేంద్రం సమీపంలోని మంచినీటి కేంద్రం వద్ద ఆమె చేతి నుంచి దాదాపు 40 గ్రాముల కడియం జారిపడింది.

వెనకే వస్తున్న కొందరు భక్తులు అది పడటం చూసి చేతిలోకి తీసుకున్నారు. ఈ దృశ్యాన్ని తిరుమల తిరుపతి దేవస్థానం (తితిదే) కమాండ్‌ కంట్రోల్‌ కేంద్రం సిబ్బంది సీసీ కెమెరాల ద్వారా గమనించారు. తితిదే ముఖ్య నిఘా, భద్రతాధికారి (సీవీఎస్వో) కె.వి.మురళీకృష్ణ ఆదేశాలతో సిబ్బంది వెంటనే కదిలారు. వీజీవో సురేంద్ర పర్యవేక్షణలో ఏవీఎస్వో వెంకటరమణ బృందం ఫుటేజీని జల్లెడ పట్టి కడియం జాడ కనిపెట్టింది. దాన్ని భక్తురాలికే అప్పగించినట్లు వెంకటరమణ తెలిపారని తితిదే శనివారం వెల్లడించింది. కడియం చేతికి అందాక ఆమె నిఘా, భద్రతా సిబ్బందికి కృతజ్ఞతలు చెప్పారు.

ఆ రోజు తిరుమలలో

శుక్రవారం తిరుమలలో 70,124 మంది స్వామివారిని దర్శించుకున్నారు. 4.03 లక్షల లడ్డూలు అమ్ముడయ్యాయి. రాత్రి 7 గంటల నుంచి శ్రీదేవి, భూదేవి సమేతంగా మలయప్పస్వామి పెద్ద శేష వాహనంపై తిరుమాడ వీధుల్లో విహరించారు.

గతంలోనూ దక్కిన సొత్తు

తిరుమల యాత్రలో పోయిన సొత్తు భక్తులకు తిరిగి దక్కడం ఇది మొదటిసారి కాదు. జూన్‌లో అలిపిరి తనిఖీ కేంద్రంలో స్కానర్‌ వద్ద తెలంగాణకు చెందిన భక్తుడు ఓ సంచి మరిచిపోయారు. దాన్ని పొరపాటున మరో వాహనంలోని వారు తీసుకెళ్లారు. ఫుటేజీ ఆధారంగా ఆ వాహనాన్ని గుర్తించిన సిబ్బంది తెల్లవారుజామున 3.30 గంటలకు అందులోని భక్తుల జాడ కనిపెట్టారు. సంచిని పరిశీలించగా 50 గ్రాముల బంగారం సహా అన్నీ భద్రంగా ఉండటంతో దాన్ని ఆ భక్తుడికి అప్పగించారు. ఆగస్టులో రెండో ఘాట్‌ రోడ్డులో ఓ భక్తుడి కుటుంబం పోగొట్టుకున్న సంచిని ద్విచక్ర వాహనదారు ఒకరు గుర్తించి జీఎన్‌సీ టోల్‌గేట్‌ వద్ద హోంగార్డుకు అప్పగించారు. అందులో 61 గ్రాముల బంగారం, రూ.2,02,840 నగదు, భూమి పత్రాలు ఉన్నాయి. గుర్తింపు పత్రాలు సరిచూశాక వాటిని ఆ భక్తుడి కుటుంబానికి అందజేశారు.

శనివారం ఉదయం భక్తుల వరుస కంపార్ట్‌మెంట్లు దాటి శిలాతోరణం వరకు చేరింది. సర్వదర్శనం (ఎస్‌ఎస్‌డీ) టోకెన్లు లేని భక్తులకు దర్శనానికి సుమారు 15 గంటలు పడుతోందని తితిదే తెలిపింది.