పుర ఎన్నికల రెండో విడత.. 23 చోట్ల నామినేషన్లు ప్రారంభం

రాష్ట్రంలో పుర ఎన్నికల రెండో విడతకు నామినేషన్ల ఘట్టం శనివారం (నవంబరు 14) మొదలైంది. నాలుగు నగరపాలక సంస్థలు, 19 పురపాలికలు, నగర పంచాయతీల్లో నవంబరు 26న పోలింగ్‌ జరగనుంది. మేయర్లు, ఛైర్‌పర్సన్లతో పాటు 1,009 మంది వార్డు సభ్యులను ఓటర్లు ఎన్నుకుంటారు. రాష్ట్ర ఎన్నికల సంఘం నవంబరు 12న ఈ మేరకు నోటిఫికేషన్‌ జారీ చేసింది. నవంబరు 30న ఓట్లు లెక్కిస్తారు.

శ్రీకాకుళం, కాకినాడ, రాజమహేంద్రవరం, మంగళగిరి–తాడేపల్లి నగరపాలక సంస్థల్లో కలిపి 260 వార్డులున్నాయి. అత్యధికంగా రాజమహేంద్రవరంలో 72. మిగతా 19 సంస్థల్లో 749 వార్డులున్నాయి. పశ్చిమ గోదావరి జిల్లాలోనే నాలుగు.. పాలకొల్లు, భీమవరం, తాడేపల్లిగూడెం, తణుకు. నెల్లూరు జిల్లాలో గూడూరు, కావలి, అల్లూరు ఉన్నాయి. మొత్తం 23 సంస్థలు 15 జిల్లాల్లో ఉన్నాయి.

16 వరకు నామపత్రాలు

రిటర్నింగ్‌, ఎన్నికల అధికారులు నవంబరు 14న ఎన్నికల నోటీసు ఇస్తారు. పురపాలికల్లో వార్డులవారీ ఓటర్ల జాబితాలు ప్రదర్శిస్తారు. ఉదయం 11 నుంచి మధ్యాహ్నం 3 గంటల వరకు నామపత్రాలు తీసుకుంటారు. 16న మధ్యాహ్నం 3 గంటలతో గడువు ముగుస్తుంది. 17న ఉదయం 11 గంటల నుంచి పరిశీలన. 19న మధ్యాహ్నం 3 గంటల వరకు ఉపసంహరణకు వీలుంది. ఆ తర్వాత బరిలో నిలిచినవారి జాబితా వెలువడుతుంది. పోలింగ్‌ ఉదయం 7 నుంచి సాయంత్రం 5 గంటల వరకు సాగుతుంది. అవసరమైతే 27న రీపోలింగ్‌ ఉంటుంది. 30న ఉదయం 8 గంటలకు లెక్కింపు మొదలవుతుంది.

24,98,152 మంది ఓటర్లలో మహిళలు 12,92,989, పురుషులు 12,04,753, ఇతరులు 410 మంది. వీరి కోసం 2,801 పోలింగ్‌ కేంద్రాలు ఉన్నాయి. 1,009 వార్డుల్లో 503 అన్ని వర్గాల మహిళలకు కేటాయించారు.

రిజర్వేషన్లు.. ఖర్చుకు పరిమితి

మంగళగిరి–తాడేపల్లి మేయర్‌ పదవి ఎస్టీ జనరల్‌కు, రాజమహేంద్రవరం ఎస్సీ జనరల్‌కు రిజర్వు అయ్యాయి. కాకినాడ పీఠం బీసీ మహిళకు, శ్రీకాకుళం పీఠం జనరల్‌ మహిళకు కేటాయించారు. 19 ఛైర్‌పర్సన్‌ పదవుల్లో ఎనిమిది మహిళలవే. తణుకు, తాడేపల్లిగూడెం, కావలి, కందుకూరు, నరసరావుపేట స్థానాలు ఎవరికీ రిజర్వు కాలేదు.

నగరపాలక సంస్థల్లో మేయర్‌, వార్డు అభ్యర్థులు రూ.5,000.. పురపాలికలు, నగర పంచాయతీల్లో రూ.3,000 డిపాజిట్‌ కట్టాలి. ఎస్సీ, ఎస్టీ, బీసీలకు సగం.. రూ.2,500, రూ.1,500. ఈ నగరాల్లో మేయర్‌ అభ్యర్థి రూ.25 లక్షలు, వార్డు అభ్యర్థి రూ.10 లక్షల వరకు ఖర్చు చేయొచ్చు. పురపాలికలో రూ.20 లక్షలు, రూ.7.50 లక్షలు.

తొలి విడతలో 13 నగరపాలక సంస్థలు, 87 పురపాలికలు, నగర పంచాయతీలకు నవంబరు 1న పోలింగ్‌ జరిగింది. సంఘం తుది గణాంకాల ప్రకారం అప్పుడు 62.16% ఓట్లు పోలయ్యాయి.

నవంబరు 12 నుంచే ఈ 23 సంస్థల్లో ఎన్నికల నియమావళి అమల్లో ఉంది. ప్రక్రియ ముగిసేవరకు ఎన్నికల విధుల్లోని అధికారుల బదిలీలపై సంఘం నిషేధం విధించింది. కలెక్టర్లు, పుర కమిషనర్లు, రిటర్నింగ్‌ అధికారుల నుంచి ఎస్సైల దాకా ఇది వర్తిస్తుంది. నంద్యాల జిల్లా ఆత్మకూరు పురపాలికలోని 20వ వార్డుకూ ఇదే షెడ్యూలు. తొలి విడతలో అక్కడ అభ్యర్థులంతా తప్పుకోవడమే ఇందుకు కారణం.