సీఐఐ సదస్సులో రూ.1,41,585 కోట్ల ఒప్పందాలు.. పెనుకొండలో కియా ప్లాంటు

విశాఖ సీఐఐ సదస్సు రెండో రోజు శుక్రవారం (నవంబరు 13) రాష్ట్ర ప్రభుత్వం 11 అవగాహన ఒప్పందాలు కుదుర్చుకుంది. ఒక జీవో కూడా జారీ చేసింది. వీటి మొత్తం విలువ రూ.1,41,585 కోట్లు అని ముఖ్యమంత్రి చంద్రబాబు తన ఎక్స్‌ ఖాతాలో వెల్లడించారు. వీటితో 10,919 మందికి ఉద్యోగాలు వచ్చే అవకాశం ఉందని తెలిపారు.

తయారీ, వైమానిక–రక్షణ, పునరుత్పాదక ఇంధనం, ఎలక్ట్రానిక్స్‌, ఐటీ–డేటా కేంద్రాలు, ఓడరేవులు–సముద్ర రవాణా రంగాల్లో ఈ ఒప్పందాలు జరిగాయి. సదస్సు వేదికైన ఆంధ్ర విశ్వవిద్యాలయం ఇంజినీరింగ్‌ కళాశాల మైదానంలో కార్యక్రమం జరిగింది. ముఖ్యమంత్రి సమక్షంలో కంపెనీల ప్రతినిధులు పత్రాలు మార్చుకున్నారు.

బ్రిజ్‌మోహన్‌ లాల్‌ ముంజాల్‌ ఉపకార వేతనాలతో 1,120 మంది విద్యార్థులకు అండగా నిలుస్తున్నందుకు హీరో మోటోకార్ప్‌ను చంద్రబాబు అభినందించారు. పీ4 కార్యక్రమం కింద 25,000 బంగారు కుటుంబాలకు సాయం అందిస్తున్నందుకు ఐటీసీనీ అభినందించారు.

పెనుకొండలో కియా ఒప్పందం

శ్రీసత్యసాయి జిల్లా పెనుకొండలో రూ.19,000 కోట్లతో కియా సంస్థ మరో ప్లాంటు నెలకొల్పనుందని ముఖ్యమంత్రి కార్యాలయం గురువారం (నవంబరు 12) రాత్రి ప్రకటించింది. దీనివల్ల 12,000 మందికి ఉద్యోగాలు వస్తాయని తెలిపింది. చంద్రబాబు, కియా ఇండియా ఎండీ, సీఈవో గ్వాంగు లీ సమక్షంలో ఈ ఒప్పందం కుదిరింది. కియా కార్పొరేషన్‌ సీనియర్‌ ఉపాధ్యక్షుడితో కలిసి గ్వాంగు లీ గురువారం సీఎంను కలిశారు.

కియా ఇండియాకు పెనుకొండలో ఇప్పటికే 536 ఎకరాల్లో కార్ల ప్లాంటు ఉంది. అక్కడ 2019 జనవరిలో ప్రయోగాత్మక ఉత్పత్తి మొదలైంది. ఏటా 3 లక్షల వాహనాల సామర్థ్యంతో దాన్ని నిర్మించారు. ప్రభుత్వ లెక్కల ప్రకారం శుక్రవారం మార్చుకున్న మొత్తం 12 పత్రాల కంటే ఈ ఒక్క ప్రాజెక్టుకే ఎక్కువ ఉద్యోగాల హామీ ఉంది. అవి 10,919 అయితే ఇవి 12,000.

గురువారం 303 ఒప్పందాల ప్రకటన

సదస్సు ప్రారంభమైన గురువారమే రూ.9.89 లక్షల కోట్ల విలువైన 303 ఒప్పందాలు సదస్సులో కుదుర్చుకుంటామని చంద్రబాబు ప్రకటించారు. రెండు రోజుల మొత్తం లెక్కను శుక్రవారం సాయంత్రం 4 గంటల వరకు సీఎం గానీ, సీఎంవో గానీ వెల్లడించలేదు. శుక్రవారం ముగింపు సమావేశంలో ఉపరాష్ట్రపతి సీపీ రాధాకృష్ణన్‌ ప్రసంగించాల్సి ఉంది.