బంగాళాఖాతంలో అల్పపీడనం.. 16 జిల్లాల్లో జల్లులు

అమరావతి: ఆగ్నేయ బంగాళాఖాతంలో శుక్రవారం (నవంబరు 13) ఉదయం 5.30 గంటలకు అల్పపీడనం ఏర్పడింది. భారత వాతావరణ శాఖ (ఐఎండీ) అదే రోజు ఉదయం 8.29 గంటలకు విడుదల చేసిన జాతీయ బులెటిన్‌లో ఈ విషయం తెలిపింది. శుక్రవారం ఉదయం 8.30 గంటల నుంచి శనివారం ఉదయం వరకు 16 జిల్లాల్లో అక్కడక్కడ వర్షం పడొచ్చని అమరావతి వాతావరణ కేంద్రం తెలిపింది. నెల్లూరు, తిరుపతి, చిత్తూరు జిల్లాల్లో మోస్తరు వాన కురిసే అవకాశం ఉంది.

అల్పపీడనం వాయవ్య దిశగా కదిలి 14న తీవ్ర అల్పపీడనంగా, 15న వాయుగుండంగా మారే అవకాశం ఉందని ఐఎండీ వెల్లడించింది. మధ్య అండమాన్‌ సముద్రంపై ఉన్న ఉపరితల ఆవర్తనం ప్రభావంతో 13న అల్పపీడనం ఏర్పడొచ్చని గురువారం (నవంబరు 12) రాత్రి 8.34 గంటల బులెటిన్‌లోనే అంచనా వేసింది.

బుధవారం నాటి అంచనాలో నెల్లూరు, తిరుపతి, చిత్తూరుకే జల్లులు పరిమితమయ్యాయి. అవీ 15 తర్వాతే వస్తాయని చెప్పారు. గురువారం మధ్యాహ్నం 1.30 గంటలకు వచ్చిన జిల్లాల అంచనాలో వాన రెండు రోజులు ముందుకొచ్చింది. కోస్తాంధ్ర, రాయలసీమ రెండు ప్రాంతాలకూ విస్తరించింది.

జిల్లాల వారీగా ఇలా..

శుక్రవారం నుంచి శనివారం ఉదయం వరకు విశాఖపట్నం, తూర్పు గోదావరి, కోనసీమ, పశ్చిమ గోదావరి, ఎన్టీఆర్‌, కృష్ణా, పల్నాడు, గుంటూరు, బాపట్ల, ప్రకాశం జిల్లాల్లో తేలికపాటి జల్లులు పడొచ్చు. సీమలో అనంతపురం, శ్రీసత్యసాయి, వైఎస్సార్‌ కడపలోనూ వాన కురవొచ్చు.

శనివారం నుంచి ఆదివారం ఉదయం వరకు నెల్లూరు, తిరుపతి, చిత్తూరులో తేలికపాటి వాన కొనసాగుతుంది. పార్వతీపురం మన్యం, అల్లూరి సీతారామరాజు జిల్లాల్లోనూ జల్లులు పడొచ్చు. 15 నుంచి 18వ తేదీ ఉదయం వరకు అన్ని జిల్లాల్లో పొడి వాతావరణమే. 18, 19 తేదీల్లో ఈ రెండు మన్యం జిల్లాల్లో మళ్లీ జల్లులు కురవొచ్చు.

శ్రీకాకుళం, విజయనగరం, అనకాపల్లి, కాకినాడ, ఏలూరు, యానాం, కర్నూలు, నంద్యాల, అన్నమయ్య జిల్లాలకు వాన సూచన లేదు. ఏ జిల్లాకూ హెచ్చరిక జారీ కాలేదు. ఐఎండీ జాతీయ బులెటిన్‌ మాత్రం రాష్ట్రంలో 13న పొడి వాతావరణం చూపింది. అందులో జల్లులు 14 నుంచే మొదలవుతాయి.

మత్స్యకారులకు, తెలంగాణకు

అమరావతి కేంద్రం నవంబరు 12 నాటి బులెటిన్‌ ప్రకారం ఏపీ తీరంలో 16 వరకు మత్స్యకారులకు ఎలాంటి హెచ్చరికా లేదు. ఐఎండీ నవంబరు 13 బులెటిన్‌ ప్రకారం 13, 14 తేదీల్లో అండమాన్‌ సముద్రంలో, 13 నుంచి 16 వరకు ఆగ్నేయ బంగాళాఖాతంలో గాలుల వేగం 40-50 కి.మీ., గరిష్ఠంగా 60 కి.మీ. ఉంటుంది. 15 నుంచి 17 వరకు నైరుతి బంగాళాఖాతంలో, 16, 17 తేదీల్లో మధ్య బంగాళాఖాతంలో ఇది 45-55 కి.మీ.కు, గరిష్ఠంగా 65 కి.మీ.కు పెరగొచ్చు. ఆ జలాల్లోకి వేటకు వెళ్లొద్దని అధికారులు సూచించారు.

తెలంగాణకు ఈ జల్లులు లేనట్లే. 19వ తేదీ ఉదయం దాకా రాష్ట్రంలో ఎక్కడా వాన పడదని హైదరాబాద్‌ వాతావరణ కేంద్రం పేర్కొంది. మరో రెండు రోజులు రాత్రి ఉష్ణోగ్రతలు సాధారణం కన్నా 2-3 డిగ్రీలు దిగువనే ఉంటాయి. గురువారం తెలంగాణ, కోస్తాంధ్ర, రాయలసీమల్లో కొన్నిచోట్ల కనిష్ఠం సాధారణం కంటే 5 డిగ్రీలకు పైగా పడిపోయిందని ఐఎండీ వెల్లడించింది. హైదరాబాద్‌లో పగలు 32, రాత్రి 17 డిగ్రీలు ఉండొచ్చు. ఉదయం పొగమంచు కమ్ముకుంటుంది.