జనక్‌పుర్‌-అయోధ్య రైలుకు రైల్వే పచ్చజెండా.. వారానికోసారి

సీతమ్మ జన్మస్థలంగా భక్తులు కొలిచే నేపాల్‌లోని జనక్‌పుర్‌ ధామ్‌ నుంచి శ్రీరాముడి జన్మభూమి అయోధ్యకు నేరుగా రైలు రానుంది. ఈ రెండు క్షేత్రాల మధ్య వారానికో రైలు నడపడానికి భారతీయ రైల్వే ఆమోదం తెలిపింది. రైల్వే మంత్రిత్వశాఖ శనివారం (నవంబరు 14) ఈ విషయం ప్రకటించింది. జనక్‌పుర్‌-అయోధ్య రైలు సుమారు 604 కిలోమీటర్లు ప్రయాణిస్తుంది.

జనక్‌పుర్‌ ధామ్‌ నేపాల్‌లోని మధేశ్‌ ప్రావిన్సులో ఉంది. అయోధ్య ఉత్తర్‌ప్రదేశ్‌లో ఉంది. రెండు దేశాల ప్రయాణికులు ఈ క్షేత్రాలకు సులువుగా చేరుకోవచ్చని రైల్వేశాఖ తన ప్రకటనలో పేర్కొంది.

పది స్టేషన్లలో ఆగుతుంది

రైలు జనక్‌పుర్‌ ధామ్‌, అయోధ్య కంటోన్మెంట్‌ మధ్య నడుస్తుంది. దారిలో జయనగర్‌, మధుబని, శిశో, సీతామఢీ, రక్సౌల్‌, నర్కటియాగంజ్‌, గోరఖ్‌పుర్‌, బస్తీ, మన్కాపుర్‌, అయోధ్య ధామ్‌ స్టేషన్లలో ఆగుతుంది. బిహార్‌ మీదుగా ఉత్తర్‌ప్రదేశ్‌లోకి ప్రవేశిస్తుంది. జనక్‌పుర్‌ ధామ్‌ నుంచి ప్రతి శనివారం బయలుదేరుతుంది. తిరుగు ప్రయాణంలో అయోధ్య కంటోన్మెంట్‌ నుంచి ప్రతి సోమవారం బయలుదేరుతుంది.

యాత్రికులు, పర్యాటకులే కాదు.. చదువు, వ్యాపారం, కుటుంబ పనుల కోసం సరిహద్దు దాటేవారికీ ఈ రైలు ఉపయోగపడుతుందని రైల్వేశాఖ తెలిపింది. బిహార్‌, నేపాల్‌ సరిహద్దు ప్రాంతాల ప్రజలకు మరో ప్రయాణ మార్గం దొరుకుతుందని పేర్కొంది. దారిలోని పట్టణాల్లో హోటళ్లు, టూర్‌ నిర్వాహకులు, చిరు వ్యాపారులు, చేతివృత్తులవారికి గిరాకీ పెరుగుతుందని వివరించింది.

2022లో పునఃప్రారంభమైన సరిహద్దు మార్గంపై

నేపాల్‌ వైపు ప్రయాణం జయనగర్‌ నుంచి మొదలయ్యే సరిహద్దు బ్రాడ్‌గేజ్‌ మార్గంపై సాగుతుంది. జయనగర్‌ నుంచి సరిహద్దు 3 కిలోమీటర్ల లోపే ఉంది. ఈ మార్గంలోని జయనగర్‌-కుర్థా విభాగాన్ని ప్రధాని నరేంద్ర మోదీ, అప్పటి నేపాల్‌ ప్రధాని షేర్‌ బహదూర్‌ దేవ్‌బా 2022 ఏప్రిల్‌ 2న ప్రారంభించారు. మరుసటి రోజు ఏప్రిల్‌ 3 నుంచి ప్రయాణికుల రైళ్లు మొదలయ్యాయి. ఈ మార్గం 1937లో సరకు రవాణా కోసం నారోగేజ్‌ లైనుగా అందుబాటులోకి వచ్చింది.

కొత్త రైలు ఎప్పటి నుంచి పట్టాలెక్కుతుందో రైల్వేశాఖ ప్రకటనలో పేర్కొనలేదు. రైలు నంబరు, వేళలు, టికెట్‌ ధరలు కూడా ప్రకటనలో లేవు.