శాంసంగ్‌ గ్యాలరీ ఫొటోలు గూగుల్‌ స్టోరేజ్‌లోకి.. 15 జీబీ ఉచితం

శాంసంగ్‌ గెలాక్సీ ఫోన్‌లో తీసిన ఫొటోలు, వీడియోలను ఇక గ్యాలరీ యాప్‌ నుంచే గూగుల్‌ స్టోరేజ్‌లో భద్రపరచుకోవచ్చు. వేరే యాప్‌, కొత్త ఖాతా అక్కర్లేదు. గూగుల్‌తో కలిసి అందిస్తున్న ‘శాంసంగ్‌ గ్యాలరీ సింక్‌’ వివరాలను శాంసంగ్‌ ఎలక్ట్రానిక్స్‌ మంగళవారం (నవంబరు 10) వెల్లడించింది. వన్‌ యూఐ 9 ఉన్న కొన్ని గెలాక్సీ ఫోన్లు, ట్యాబ్‌లలో ఇది మొదలైంది. మిగతా మోడళ్లకు దశలవారీగా అందుతుంది. సింక్‌ అయిన ఫొటోల అసలు ఫైళ్లను ఫోన్‌ నుంచి తొలగించి చోటు ఖాళీ చేసే ‘ఫ్రీ అప్‌ స్పేస్‌’ సదుపాయమూ కొత్తగా వచ్చింది. గ్యాలరీలో వాటి చిన్న చిత్రాలు కనిపిస్తాయి.

గ్యాలరీ ఫొటోలు మైక్రోసాఫ్ట్‌ వన్‌డ్రైవ్‌తో నేరుగా సింక్‌ కావడం సెప్టెంబరు 30తో ఆగిపోయింది. అప్పటికే వన్‌డ్రైవ్‌లోకి వెళ్లిన ఫొటోలను ఆ యాప్‌లో లేదా వెబ్‌సైట్‌లో చూసుకోవచ్చని శాంసంగ్‌ తెలిపింది. ఆ ఫైళ్లు చెక్కుచెదరవని, అయితే గ్యాలరీలో ఇక కనిపించవని మైక్రోసాఫ్ట్‌ సహాయ పేజీ చెబుతోంది.

ఆన్‌ చేసుకోవడం ఇలా

శాంసంగ్‌ ఇండియా సహాయ పేజీలో ఇంగ్లిష్‌, హిందీల్లో ఈ అడుగులున్నాయి. గ్యాలరీ యాప్‌ తెరిచి, కింద కుడి మూలన ఉన్న మెనూ గుర్తును నొక్కి ‘సెట్టింగ్స్‌’లోకి వెళ్లాలి. అక్కడ ‘సింక్‌ ఫొటోస్‌ అండ్‌ వీడియోస్‌’ ఎంచుకోవాలి. గూగుల్‌ ఖాతాను ఎంపిక చేసి స్విచ్‌ ఆన్‌ చేయాలి. ‘కంటిన్యూ’, ఆపై ‘సింక్‌ నౌ’ నొక్కాలి. ‘ఆల్బమ్స్‌ టు సింక్‌’లో స్క్రీన్‌షాట్లు, డౌన్‌లోడ్స్‌ లాంటి ఫోల్డర్లనూ చేర్చుకోవచ్చు. వన్‌ యూఐ 9.0, ఆ పై వెర్షన్లలోనే ఇది పనిచేస్తుందని ఆ పేజీ చెబుతోంది. వెర్షన్‌ను ‘సెట్టింగ్స్‌’లో ‘అబౌట్‌ ఫోన్‌’, ఆపై ‘సాఫ్ట్‌వేర్‌ ఇన్ఫర్మేషన్‌’ కింద చూసుకోవచ్చు.

వన్‌ యూఐ 9 మొదట గెలాక్సీ జడ్‌ ఫోల్డ్‌8 అల్ట్రా, జడ్‌ ఫోల్డ్‌8, జడ్‌ ఫ్లిప్‌8 ఫోన్లలో వచ్చింది. సెప్టెంబరు 16 నుంచి గెలాక్సీ ఎస్‌26, ఎస్‌26 ప్లస్‌, ఎస్‌26 అల్ట్రాలతో విస్తరణ మొదలైంది. గ్యాలరీ సింక్‌ ఏయే దేశాల్లో ఉందో సంస్థ ప్రకటనలో లేదు. మార్కెట్‌, మోడల్‌ను బట్టి మారుతుందని మాత్రమే పేర్కొంది.

ఖర్చెంత.. జాగ్రత్తలేంటి

గ్యాలరీ సింక్‌తో విడిగా స్టోరేజ్‌ రాదు. ఫొటోలు గూగుల్‌ ఖాతా స్టోరేజ్‌లోకే వెళ్తాయి. అందులో 15 జీబీ వరకు ఉచితం. జీమెయిల్‌, గూగుల్‌ డ్రైవ్‌, గూగుల్‌ ఫొటోస్‌ కూడా దీన్నే పంచుకుంటాయి. ఫైళ్లు అసలు నాణ్యతతోనే నిల్వ అవుతాయి. ఇంకా చోటు కావాలంటే ‘గూగుల్‌ వన్‌’ ప్లాన్‌ కొనాలి.

గ్యాలరీలో ఒక ఫొటోను తొలగిస్తే గూగుల్‌ స్టోరేజ్‌ నుంచీ, అవే ఖాతాలున్న ఇతర గెలాక్సీ పరికరాల నుంచీ అది పోతుంది. మెమరీ కార్డులోని ఫొటోలు ఫోన్‌ స్టోరేజ్‌లోకి మార్చాకే సింక్‌ అవుతాయి. వ్యక్తిగత గూగుల్‌ ఖాతాలకే ఈ సదుపాయం. తల్లిదండ్రుల పర్యవేక్షణలోని ఖాతాలకు, గూగుల్‌ వర్క్‌స్పేస్‌ ఖాతాలకు వర్తించదు. సింక్‌ ఆన్‌ చేయకముందే గూగుల్‌ స్టోరేజ్‌లో ఉన్న ఫొటోలు ప్రస్తుతానికి గ్యాలరీలో వాటంతటవే కనిపించవు. కొత్త గెలాక్సీ ఫోన్‌లో అవే ఖాతాలతో సింక్‌ ఆన్‌ చేస్తే పాత ఫొటోల చిన్న చిత్రాలు కనిపిస్తాయి. మిగతా గెలాక్సీ మోడళ్లకు తేదీలను శాంసంగ్‌ ప్రకటించలేదు.