4జీ లేని గ్రామాలు 11,372.. మరో 26 వేల మొబైల్‌ సైట్లు

దేశంలో 4జీ లేని గ్రామాలు నాలుగేళ్లలో బాగా తగ్గాయి. 2022లో ఇలాంటి గ్రామాలు 45,180 ఉండేవి. 2026 నాటికి ఆ సంఖ్య 11,372కు దిగొచ్చింది. కేంద్ర టెలికాం శాఖ బుధవారం (నవంబరు 11) ఈ వివరాలు వెల్లడించింది. మిగిలిన ఊళ్ల కోసం మరో 26,000 మొబైల్‌ సైట్లకు అనుమతి ఇచ్చినట్లు తెలిపింది.

లక్ష్యంలో 74 శాతం పూర్తి

2022 జులై 27న కేంద్ర మంత్రివర్గం ‘4జీ సంతృప్త ప్రాజెక్టు’ను ఆమోదించింది. రూ.26,316 కోట్ల వ్యయంతో 24,680 గ్రామాలకు 4జీ ఇవ్వాలన్నది లక్ష్యం. 2జీ, 3జీ మాత్రమే ఉన్న 6,279 గ్రామాలనూ 4జీకి మార్చాలని నిర్ణయించారు. స్వదేశీ 4జీ పరిజ్ఞానంతో ఈ పనిని బీఎస్‌ఎన్‌ఎల్‌కు అప్పగించారు.

ఇప్పటివరకు 18,291 సైట్లు పనిచేస్తున్నాయి. అంటే లక్ష్యంలో దాదాపు 74 శాతం. ఇంకా సుమారు 6,389 సైట్లు రావాలి. అక్టోబరులో ఈ టవర్ల కింద ఒక్క రోజే గరిష్ఠంగా 10,21,048 మంది డేటా వాడారు. నెల మొత్తంలో 1.86 కోట్ల జీబీ ఖర్చయింది. ఒక్కొక్కరు సగటున 18.3 జీబీ వాడారు. కొండ ప్రాంతాలు, విసిరేసినట్లున్న పల్లెలు, గిరిజన ఆవాసాలు ఇంకా సవాలేనని టెలికాం శాఖ పేర్కొంది.

సిగ్నల్‌ సరిగా లేకపోతే ఇలా చేయండి

ముందుగా మీ ఊరిలో వేగం ఎంతో తెలుసుకోండి. ట్రాయ్‌ ‘మైస్పీడ్‌’, ‘మైకాల్‌’ యాప్‌లతో ఇంటర్నెట్‌ వేగం, కాల్‌ నాణ్యత పరీక్షించవచ్చు. ఆ ఫలితాలు ట్రాయ్‌ ‘నెట్‌వర్క్‌ అనుభవ్‌’ పోర్టల్‌లో (anubhav.trai.gov.in) మ్యాప్‌పై కనిపిస్తాయి. మీ ప్రాంతంలో ఏ సంస్థ సేవలు మెరుగ్గా ఉన్నాయో అక్కడ చూడొచ్చు. సిమ్‌ మార్చే ముందు ఇది పనికొస్తుంది.

ఫిర్యాదులు మాత్రం ముందు మీ టెలికాం సంస్థకే చేయాలి. వ్యక్తిగత సేవల సమస్యలను తాము చూడబోమని ట్రాయ్‌ స్పష్టం చేసింది. 4జీ లేని గ్రామాల రాష్ట్రాల వారీ జాబితాను టెలికాం శాఖ ఈసారి వెల్లడించలేదు.