వైద్య పరికరాల తయారీకి రూ.2,700 కోట్లు.. 2035-36 వరకు పీఎల్‌ఐ

దిల్లీ: వైద్య పరికరాల తయారీ సంస్థలకు కేంద్రం మరో అవకాశం ఇచ్చింది. ఉత్పత్తి ఆధారిత ప్రోత్సాహక (పీఎల్‌ఐ) పథకాన్ని 2035-36 వరకు పొడిగించింది. కొత్త దరఖాస్తులను ఆహ్వానిస్తున్నట్లు కేంద్ర ఔషధ విభాగం మంగళవారం (నవంబరు 10) ప్రకటించింది. పథకంలో ఇంకా సుమారు రూ.2,700 కోట్లు అందుబాటులో ఉన్నాయి. దరఖాస్తుల కోసం ఆన్‌లైన్‌ పోర్టల్‌ పది రోజుల్లో మొదలవుతుందని తెలిపింది.

ఈ పథకం తెలుగు రాష్ట్రాలకు కొత్త కాదు. 2024 నవంబరు 25 నాటి ఆమోదాల జాబితాలో 32 దరఖాస్తులున్నాయి. వాటిలో ఐదింటిలో ఏపీ, తెలంగాణల్లోని తయారీ కేంద్రాల పేర్లున్నాయి. విశాఖపట్నం పేరుతో ట్రివిట్రాన్‌ హెల్త్‌కేర్‌ (ఆమోదిత ఉత్పత్తుల్లో సీటీ స్కాన్‌ యంత్రాలు), ఇన్‌వల్యూషన్‌ హెల్త్‌కేర్‌ (స్టెంట్లు, బెలూన్‌ క్యాథెటర్లు), వారెక్స్‌ ఇమేజింగ్‌ (డిజిటల్‌ ఎక్స్‌రే డిటెక్టర్లు) ఉన్నాయి. సహజానంద్‌ మెడికల్‌ టెక్నాలజీస్‌ దరఖాస్తులో సూరత్‌తో పాటు మెదక్‌ పేరుంది (స్టెంట్లు, గుండె కవాటాలు). హైదరాబాద్‌ నుంచి మ్యాజిక్‌ మెడికల్‌ సొల్యూషన్స్‌ (క్యాథెటర్‌ ట్యూబులు) ఉంది. విశాఖలోని ఏపీ మెడ్‌టెక్‌ జోన్‌లో వందకు పైగా సంస్థలు పని చేస్తున్నాయని ఆ జోన్‌ వెబ్‌సైట్‌ పేర్కొంది.

చిన్న సంస్థలకు సడలింపులు

కొత్త మార్గదర్శకాలు మంగళవారమే విడుదలయ్యాయి. పథకాన్ని నాలుగు విభాగాలుగా విభజించారు. ఒకసారి వాడే పరికరాలు, ఇంప్లాంట్లు మొదటిది. కీలక విడిభాగాలు రెండోది. దేశంలో తయారీ ఇంకా తొలి దశలో ఉన్న ఖరీదైన యంత్రాలు మూడోది. ఇక్కడ బిగింపు మాత్రమే జరుగుతున్న ఖరీదైన యంత్రాలు నాలుగోది. మూడేళ్ల సగటు వార్షిక టర్నోవర్‌ రూ.150 కోట్ల లోపు ఉన్న సంస్థ మూడు విభాగాల్లో కనీసం రూ.50 కోట్లు పెట్టుబడి పెట్టాలి. పెద్ద సంస్థలకు, విడిభాగాల తయారీదారులకు కనీస పెట్టుబడి షరతు లేదు. ప్రోత్సాహకం పొందడానికి ఉన్న కనీస అమ్మకాల నిబంధననూ తొలగించారు.

విడిభాగాలకు, మూడో విభాగానికి అత్యధిక ప్రోత్సాహకం దక్కుతుంది. మొదటి మూడేళ్లు అమ్మకాలపై 10%, నాలుగో ఏడాది 8%, ఐదో ఏడాది 6% ఇస్తారు. అంటే ఇంతకుముందు అమ్మకాలు లేని ఉత్పత్తిని తొలి ఏడాది రూ.కోటికి అమ్మితే రూ.10 లక్షలు వస్తాయి. ఇందుకు తయారీ గొలుసుపై సంస్థ తాను ఇచ్చిన హామీని నెరవేర్చాలి. లేదంటే 7%.. అంటే రూ.7 లక్షలే అందుతాయి. ఒకసారి వాడే పరికరాలు, ఇంప్లాంట్లకు తొలి రెండేళ్లు 7%, చివరి రెండేళ్లు 3% ఇస్తారు.

ఇప్పటికే 60కి పైగా పరికరాలు

ఈ పథకం 2020-21లో మొదలైంది. దీని కింద సీటీ స్కానర్లు, ఎంఆర్‌ఐ యంత్రాలు, క్యాథ్‌ల్యాబ్‌లు, డయలైజర్లు, గుండె ఇంప్లాంట్లు సహా 60కి పైగా పరికరాలు, విడిభాగాల తయారీ దేశంలో మొదలైందని విభాగం తెలిపింది. వీటి ఉత్పత్తి విలువ రూ.16,000 కోట్లు దాటింది. పథకానికి ఆమోదించిన మొత్తం కేటాయింపు రూ.3,420 కోట్లు.

నెలాఖరు వరకు వచ్చిన దరఖాస్తులను కలిపి పరిశీలిస్తారు. 60 రోజుల్లో నిర్ణయం తీసుకుంటారు. ఒక్కో దరఖాస్తుకు రుసుము రూ.లక్ష. ఈ మొత్తాన్ని తిరిగి ఇవ్వరు. భూమి, భవనాల ఖర్చును పెట్టుబడిగా లెక్కించరు. ఆమోదం పొందిన సంస్థ గరిష్ఠంగా మూడేళ్లలో కర్మాగారం నెలకొల్పాలి. ఆ తర్వాత గరిష్ఠంగా ఐదేళ్లు ప్రోత్సాహకం అందుతుంది. దరఖాస్తు విధానాన్ని విభాగం తన వెబ్‌సైట్‌లో ప్రకటించనుంది.