అగ్నివీర్లకు మరో రెండేళ్ల సేవ: 75 శాతం మందికి రెండో విడత, ఆ తర్వాత అందరికీ రెగ్యులర్ సైనికులుగా చేరే అవకాశం

అగ్నిపథ్ పథకంలో కేంద్రం కీలక మార్పు చేసింది. నాలుగేళ్ల సేవ తర్వాత శాశ్వత ఉద్యోగానికి ఎంపిక కాని 75 శాతం అగ్నివీర్లకు మరో రెండేళ్లు సేవ చేసే అవకాశం కల్పిస్తూ కేంద్ర మంత్రివర్గం నవంబర్ 4 బుధవారం ఆమోదం తెలిపింది. ఈ విషయాన్ని రక్షణ మంత్రిత్వ శాఖ ప్రకటించింది.

2022 జూన్‌లో మొదలైన ఈ పథకంలో తొలి దశ యథాతథంగా ఉంటుంది. నాలుగేళ్లు పూర్తయ్యాక ప్రతి బ్యాచ్‌లో 25 శాతం మందిని ప్రతిభ ఆధారంగా రెగ్యులర్ సర్వీసులోకి తీసుకుంటారు. మిగిలినవారు ఇప్పటివరకు సేవా నిధి మొత్తంతో ఇంటికి వెళ్లాల్సి వచ్చేది. ఇకపై వారు కోరుకుంటే మరో రెండేళ్లు కొనసాగవచ్చు. ఆ గడువు ముగిశాక ఎంపిక ప్రమాణాలు అందుకున్న వారందరికీ రెగ్యులర్ సైనికులుగా చేరే అవకాశం ఇస్తారు.

జీతం పెంపు, సేవా నిధిలో ప్రభుత్వ వాటా ఎక్కువ

రెండో విడతలో మొదటి ఏడాది నెలకు రూ.43,500, రెండో ఏడాది రూ.47,500 జీతం ఇస్తామని త్రివిధ దళాల అధిపతి (సీడీఎస్) జనరల్ ఎన్.ఎస్.రాజా సుబ్రమణి తెలిపారు. తొలి బ్యాచ్ అగ్నివీర్ల ప్రారంభ వేతనం రూ.30,000. ఆరేళ్ల తర్వాత బయటకు వెళ్లేవారి సేవా నిధిలో ప్రభుత్వం 70 శాతం భరిస్తుంది. ఇప్పటివరకు ఇది చెరి సగం. సీనియారిటీ ప్రయోజనాలు కూడా ఉంటాయి.

నాలుగేళ్లుగా ప్రతి అగ్నివీర్ పనితీరును ఏటా సమీక్షించిన తర్వాతే ఈ నిర్ణయం తీసుకున్నామని సీడీఎస్ చెప్పారు. క్రమశిక్షణ, కొత్త పరిస్థితులకు అలవాటుపడే తీరు, విజిలెన్స్ కేసులు లేకపోవడం వంటివి రెగ్యులర్ ఎంపికలో చూస్తారు. అగ్నిపథ్ పథకం కొనసాగుతుందని ఆయన స్పష్టం చేశారు. దీన్ని ‘సెకండ్ టూర్ ఆఫ్ డ్యూటీ‘గా పేర్కొన్న రక్షణ మంత్రి రాజ్‌నాథ్ సింగ్, ప్రధాని నరేంద్ర మోదీకి కృతజ్ఞతలు తెలిపారు.

నవంబర్‌లో నౌకాదళం తొలి బ్యాచ్

సైన్యం, నౌకాదళం, వాయుసేనల్లో మూడు లక్షల మందికి పైగా అగ్నివీర్లు ఉన్నారు. నౌకాదళంలో తొలి బ్యాచ్ నవంబర్‌లోనే నాలుగేళ్లు పూర్తి చేసుకుంటోంది. సైన్యం, వాయుసేన తొలి బ్యాచ్‌లు డిసెంబర్ చివరికి ఆ గడువుకు చేరుకుంటాయి. కొత్త విధానం కింద మొదట నిర్ణయం తీసుకోవాల్సింది వీరే.