తెలంగాణకు మరో రూ.3,892 కోట్ల పట్టణ ప్రాజెక్టులు: జలమండలి గోదావరి తాగునీటి పథకం, వరంగల్ వరద కాలువలకు కేంద్రం ఆమోదం

హైదరాబాద్‌కు గోదావరి నీళ్లు తెచ్చే పథకానికి, వరంగల్ నగరంలో వరద నీటి కాలువల ఆధునికీకరణకు కేంద్రం పచ్చజెండా ఊపింది. కేంద్ర అర్బన్ ఛాలెంజ్ ఫండ్ (యూసీఎఫ్) కింద తెలంగాణకు చెందిన మరో ఐదు పట్టణ ప్రాజెక్టులకు జాతీయ అపెక్స్ కమిటీ (ఎన్ఏసీ) ఆమోదం తెలిపింది. వీటి మొత్తం విలువ రూ.3,892 కోట్లు. నవంబర్ 3 మంగళవారం దిల్లీలో జరిగిన కమిటీ నాలుగో సమావేశంలో ఈ నిర్ణయం వెలువడింది.

ఏ పనికి ఎంత

హైదరాబాద్ జలమండలి చేపట్టిన గోదావరి తాగునీటి సరఫరా పథకం రెండు, మూడో దశలకు రూ.1,992 కోట్లు ఆమోదించారు. గ్రేటర్ వరంగల్ నగరపాలక సంస్థ పరిధిలో వరద నీటి కాలువల వ్యవస్థను పూర్తిగా మెరుగుపరిచేందుకు రూ.1,465 కోట్లు కేటాయించారు. చారిత్రక వరంగల్ కోట కందకం పునరుద్ధరణకు రూ.209 కోట్లు, హనుమకొండ సెంట్రల్ బిజినెస్ డిస్ట్రిక్ట్ అభివృద్ధికి రూ.169 కోట్లు మంజూరయ్యాయి. జోగులాంబ గద్వాల జిల్లాలోని అలంపూర్ ఆలయ పట్టణంలో వారసత్వ, పర్యాటక పనులకు రూ.57.5 కోట్లు దక్కాయి. ఈ వివరాలను పురపాలక, పట్టణాభివృద్ధి శాఖ కార్యదర్శి టి.కె.శ్రీదేవి వెల్లడించారు.

ఇప్పటివరకు జరిగిన నాలుగు సమావేశాల్లో యూసీఎఫ్ కింద తెలంగాణకు మొత్తం రూ.9,573 కోట్ల ప్రాజెక్టులు మంజూరయ్యాయి. వీటిలో రూ.4,674.6 కోట్ల గ్రేటర్ వరంగల్ భూగర్భ మురుగునీటి వ్యవస్థ అతి పెద్దది. కరీంనగర్ పట్టణ అభివృద్ధికి రూ.840 కోట్లు, ఖమ్మం సమీకృత కమాండ్ కంట్రోల్ కేంద్రానికి రూ.160 కోట్లు తొలి సమావేశంలోనే ఆమోదం పొందాయి. ఈ పనులను ప్రభుత్వ–ప్రైవేటు భాగస్వామ్యం, హైబ్రిడ్ యాన్యుటీ విధానం, సంస్థాగత రుణాలతో చేపడతామని శ్రీదేవి తెలిపారు.