దీపావళి టపాసులు: ఏపీలో 4,226 దుకాణాలకు లైసెన్సులు; ఆసుపత్రులు, విద్యాసంస్థల నుంచి 300 మీటర్ల లోపు కాల్చొద్దు

దీపావళి టపాసులు అమ్మే 4,226 దుకాణాలకు తాత్కాలిక లైసెన్సులు ఇచ్చినట్లు ఆంధ్రప్రదేశ్ విపత్తు స్పందన, అగ్నిమాపక సేవల శాఖ శుక్రవారం, నవంబర్ 6న ప్రకటించింది. మొత్తం 4,307 మంది వ్యాపారులు దరఖాస్తు చేశారు. అత్యధికంగా తూర్పు గోదావరి జిల్లా నుంచి 459 దరఖాస్తులు వచ్చాయి. కాకినాడ నుంచి 365, కృష్ణా నుంచి 350, కోనసీమ నుంచి 317 వచ్చాయి.

ఈసారి లైసెన్సు పొందేందుకు అగ్నిమాపక కేంద్రం చుట్టూ తిరగాల్సిన అవసరం లేదని శాఖ ఇన్‌ఛార్జి డైరెక్టర్ జనరల్ పి. వెంకటరమణ తెలిపారు. వ్యాపారులు తమ పేరు, దుకాణం పెట్టే చిరునామా, జిల్లా, మండలం, దగ్గర్లోని అగ్నిమాపక కేంద్రం, ఫోన్ నంబర్‌ను 9441236448 వాట్సాప్ నంబర్‌కు పంపాలి. తర్వాత వచ్చే లింక్ ద్వారా యూపీఐ లేదా క్యూఆర్ కోడ్‌తో రూ.500 కడితే లైసెన్సు దానంతట అదే తయారవుతుంది. మరో రెండు రోజులు దరఖాస్తులు తీసుకుంటామని, సందేహాలుంటే 9100108101 లేదా 7993987418 నంబర్లకు ఫోన్ చేయవచ్చని ఆయన చెప్పారు.

గ్రీన్ టపాసులకే అనుమతి

మరోవైపు రాష్ట్ర కాలుష్య నియంత్రణ మండలి (ఏపీపీసీబీ) జిల్లా కలెక్టర్లు, ఎస్పీలు, పురపాలక కమిషనర్లకు దీపావళి నిబంధనలు పంపింది. గాలి నాణ్యత ఓ మోస్తరుగా గానీ, అంతకన్నా బాగా గానీ ఉన్న పట్టణాల్లో సీఎస్ఐఆర్–నీరి ఆమోదించిన గ్రీన్ టపాసులనే అనుమతిస్తారు. ప్రతి ప్యాకెట్‌పై క్యూఆర్ కోడ్ తప్పనిసరి. బేరియం లవణాలు కలిపిన సంప్రదాయ టపాసులపై నిషేధం ఉంది.

ఆసుపత్రులు, విద్యాసంస్థలు, నర్సింగ్ హోమ్‌లు, నిశ్శబ్ద ప్రాంతాలకు 300 మీటర్ల దూరం లోపల టపాసులు కాల్చకూడదు. నివాస ప్రాంతాల్లో శబ్దం పగలు 55, రాత్రి 45 డెసిబెల్స్ మించరాదు. రాత్రి 10 నుంచి ఉదయం 6 గంటల మధ్య అనుమతి లేకుండా లౌడ్‌స్పీకర్లు వాడితే పరిహారం కింద రూ.10,000 వసూలు చేసి, పరికరాలను స్వాధీనం చేసుకుంటారు. నిషేధిత టపాసుల అమ్మకం, రవాణాను అడ్డుకునేందుకు అధికారులు సంయుక్త తనిఖీ బృందాలు ఏర్పాటు చేయాలని మండలి ఆదేశించింది. దీపావళి నవంబర్ 8 ఆదివారం వస్తోంది.