దీపావళి స్వీట్లు కొనే ముందు ట్రేపై ‘బెస్ట్ బిఫోర్’ తేదీ చూడండి: ఏ మిఠాయి ఎన్ని రోజులు నిలుస్తుందో చెప్పిన ఎఫ్ఎస్ఎస్ఏఐ

ధన త్రయోదశి నుంచి దీపావళి వరకు మిఠాయి దుకాణాల ముందు బారులు తీరే రోజులివి. దీపావళి స్వీట్లు విడిగా కొనేటప్పుడు అవి ఉంచిన ట్రే మీద ‘బెస్ట్ బిఫోర్‘ తేదీ రాసి ఉందో లేదో ముందుగా చూడాలి. భారత ఆహార భద్రత, ప్రమాణాల సంస్థ (ఎఫ్ఎస్ఎస్ఏఐ) 2020 అక్టోబర్ 1 నుంచి ఈ తేదీని తప్పనిసరి చేసింది. తయారీ తేదీ రాయడం మాత్రం దుకాణదారుడి ఇష్టం.

తెలంగాణలో ఈ నిబంధనల అమలును తెలంగాణ ఆహార, ఔషధ ప్రమాణాల సంస్థ (టీజీ సేఫ్) పర్యవేక్షిస్తోంది. ఆగస్టు 25 నుంచి అక్టోబర్ 28 వరకు ఆరు విడతల్లో స్వీట్ల తయారీ, విక్రయ కేంద్రాల్లో 141 తనిఖీలు చేసి 135 నమూనాలు సేకరించినట్లు సంస్థ లెక్కలు చెబుతున్నాయి. 17 యూనిట్ల కార్యకలాపాలను నిలిపివేశారు. లైసెన్సు లేని 8 యూనిట్లను మూసివేశారు. రూ.70.70 లక్షల విలువైన 24.88 టన్నుల స్వీట్లు, ముడిసరుకును సీజ్ చేశారు.

ఏ మిఠాయి ఎన్ని రోజులు

బెస్ట్ బిఫోర్ తేదీని స్వీటు రకం, స్థానిక వాతావరణం చూసి దుకాణదారే నిర్ణయించాలి. ఇందుకోసం ఎఫ్ఎస్ఎస్ఏఐ ఒక సూచిక జాబితా ఇచ్చింది. కలాకంద్‌ను తయారైన రోజే తినేయాలి. రసగుల్లా, సందేశ్ లాంటి బెంగాలీ స్వీట్లను ఫ్రిజ్‌లో పెట్టి రెండు రోజుల్లో తినాలి. పేడా, మిల్క్ కేక్, బూందీ లడ్డూ లాంటి కోవా స్వీట్లు నాలుగు రోజులు, కాజు కట్లీ, బేసన్ బర్ఫీ ఏడు రోజులు నిలుస్తాయి. చిక్కీలు, సోహన్ హల్వా నెల రోజుల వరకు పాడవవు.

దుకాణానికి ఎఫ్ఎస్ఎస్ఏఐ లైసెన్సు ఉందో లేదో ‘ఫుడ్ సేఫ్టీ కనెక్ట్‘ యాప్‌లో తెలుసుకోవచ్చు. గడువు తీరిన లేదా అపరిశుభ్రంగా తయారైన ఆహారం కనిపిస్తే అదే యాప్‌లో ఫొటో, ప్రదేశం వివరాలతో ఫిర్యాదు చేయవచ్చు. ఆ ఫిర్యాదు సంబంధిత ఆహార భద్రత అధికారులకు చేరుతుంది. దాని స్థితిని యాప్‌లోనే చూసుకోవచ్చు.