క్యాన్సర్‌ మందుల ధరలు తగ్గాయి.. రూ.713 మాత్రలు ఇక రూ.25

దిల్లీ: క్యాన్సర్‌ మందుల ధరలు దేశవ్యాప్తంగా తగ్గాయి. కొత్త గరిష్ఠ చిల్లర ధరలు (ఎంఆర్‌పీ) సోమవారం (నవంబరు 9) నుంచి అమల్లోకి వచ్చాయి. ఆదివారం నాటికి 85 కంపెనీలు 121 ఔషధాలకు చెందిన 1,364 ఫార్ములేషన్ల ధరలను సవరించాయని జాతీయ ఔషధ ధరల నియంత్రణ సంస్థ (ఎన్‌పీపీఏ) ప్రకటించింది. అంతకు ఒక్క రోజు ముందు ఈ లెక్క 76 కంపెనీలు, 1,225 ఫార్ములేషన్లే.

రోగులకు ఏటా రూ.3,540.38 కోట్లు ఆదా అవుతుందని సంస్థ తాజాగా లెక్కగట్టింది. నవంబరు 7 నాటి అంచనా రూ.3,502.31 కోట్లు. ధర సగానికి పైగా తగ్గిన బ్రాండ్లు 600 నుంచి 679కి పెరిగాయి. అత్యధిక తగ్గింపు 96.45%.

పూర్తి జాబితా చెబుతున్నదిదీ

ఎన్‌పీపీఏ నవంబరు 9న విడుదల చేసిన బ్రాండ్ల వారీ జాబితాలో 1,366 మందులున్నాయి. ఆదివారం లెక్క కంటే ఇవి రెండు ఎక్కువ. వాటిలో 1,165 మందుల ధర తగ్గింది. 201 మందుల ధర మారలేదు.

అత్యధిక తగ్గింపు ‘అనస్టేజ్‌’ మాత్రలది. హైదరాబాద్‌ కేంద్రంగా పనిచేసే మెడ్‌ప్లస్‌ హెల్త్‌ సర్వీసెస్‌ వీటిని విక్రయిస్తోంది. రొమ్ము క్యాన్సర్‌ చికిత్సలో వాడే అనస్ట్రోజోల్‌ 1 ఎంజీ మాత్రలివి. పది మాత్రల ప్యాక్‌ ధర రూ.713.30 నుంచి రూ.25.35కు దిగింది. మరోవైపు సర్వియర్‌ సంస్థ ‘వొరానిగో’ 40 ఎంజీ మాత్రల ధర మారలేదు. 30 మాత్రలకు రూ.6 లక్షలే.

హైదరాబాద్‌కు చెందిన మూడు కంపెనీల మందులు జాబితాలో 152 ఉన్నాయి. హెటిరో హెల్త్‌కేర్‌ 59 మందుల్లో 57 చౌకయ్యాయి. నాట్కో ఫార్మా 57లో 53, డాక్టర్‌ రెడ్డీస్‌ ల్యాబొరేటరీస్‌ 36లో 22 మందుల ధరలు తగ్గాయి. హెటిరో ‘సిజుమాబ్‌’ 400 ఎంజీ ఇంజెక్షన్‌ రూ.57,816 నుంచి రూ.10,211కు వచ్చింది. ఇది బెవాసిజుమాబ్‌ ఔషధం. డాక్టర్‌ రెడ్డీస్‌ ‘వెర్సావో’ 400 ఎంజీ వయల్‌ రూ.55,005 నుంచి రూ.12,400.75కు తగ్గింది.

తగ్గింపులో ఈ తేడాకు నిబంధన తీరే కారణం. అక్టోబరు 17 నాటి ఉత్తర్వు 137 క్యాన్సర్‌ ఔషధాలపై వ్యాపార మార్జిన్‌ను 30%కి పరిమితం చేసింది. తయారీ సంస్థ స్టాకిస్టుకు ఇచ్చే ధరకు, ఎంఆర్‌పీకి మధ్య ఉన్న తేడానే ఈ మార్జిన్‌. అంటే ప్రతి మందూ 30% చౌక కాదు. బ్రాండు, మోతాదు, ప్యాక్‌ను బట్టి తగ్గింపు మారుతుందని ఎన్‌పీపీఏ వివరించింది.

ఎక్కువ వసూలు చేస్తే..

మందుల దుకాణాలు, ఆసుపత్రి ఫార్మసీలు సవరించిన ఎంఆర్‌పీకి మించి వసూలు చేయకూడదు. ఏపీ, తెలంగాణ రోగులు ప్యాక్‌పై ఉన్న ధరను ‘ఫార్మా సహీ దామ్‌’ యాప్‌లో లేదా nppa.gov.in వెబ్‌సైట్‌లో సరిచూసుకోవచ్చు. బిల్లు, మందు ప్యాకింగ్‌ను భద్రపరచుకోవాలని సంస్థ సూచించింది. ఎక్కువ వసూలు చేస్తే ‘ఫార్మా జన్‌ సమాధాన్‌’ పోర్టల్‌లో లేదా 1800-111-255 నంబరుకు ఫిర్యాదు చేయవచ్చు. రాష్ట్ర ఔషధ నియంత్రణ అధికారినీ సంప్రదించవచ్చు.

ఈ పరిమితి జాబితాలోని మందులకే వర్తిస్తుంది. క్యాన్సర్‌ చికిత్సలోని ఇతర ఛార్జీలకు వర్తించదు. రోగులకు కంపెనీలు అందించే సహాయ పథకాలపై దీని ప్రభావం ఉండబోదని ఎన్‌పీపీఏ తెలిపింది.