ప్రధాన కంటెంట్‌కు వెళ్లండి

హార్మోన్లను దెబ్బతీసే రసాయనాలు గర్భంలోనే శిశువుకు.. ఐరాస నివేదిక

ప్లాస్టిక్‌, పురుగుమందులు, సౌందర్య ఉత్పత్తుల్లోని రసాయనాలు సంతానోత్పత్తి, మెదడు ఎదుగుదల, జీవక్రియపై ప్రభావం చూపుతాయనడానికి ఆధారాలు బలపడ్డాయి. 2012 తర్వాత యూఎన్‌ఈపీ, డబ్ల్యూహెచ్‌ఓ విడుదల చేసిన తొలి సమగ్ర నివేదిక ఇది.

వంటగది అరుగుపై ప్లాస్టిక్‌ డబ్బాలు, పాల సీసా, నీళ్ల సీసా, స్టీలు క్యారియర్‌, పప్పు సీసా, రెండు లోషన్‌ సీసాలు.. వెనక గర్భిణి

జెనీవా: శరీరంలో హార్మోన్లను దెబ్బతీసే రసాయనాలు గర్భంలోనే శిశువుపై ప్రభావం చూపగలవని ఐక్యరాజ్యసమితి పర్యావరణ కార్యక్రమం (యూఎన్‌ఈపీ), ప్రపంచ ఆరోగ్య సంస్థ (డబ్ల్యూహెచ్‌ఓ) వెల్లడించాయి. పదేళ్లకు పైగా సాగిన పరిశోధనలతో వీటి దుష్ప్రభావాలపై ఆధారాలు బలపడ్డాయని మంగళవారం (నవంబరు 17) విడుదల చేసిన 2026 నివేదికలో తెలిపాయి.

రెండు సంస్థలు 2012లో చేసిన అధ్యయనం తర్వాత ఇదే తొలి సమగ్ర ప్రపంచ నివేదిక. వీటి ఆనవాళ్లు మనుషుల రక్తంలో, తల్లిపాలలో, బొడ్డుతాడు రక్తంలో కనిపించాయని నివేదిక పేర్కొంది. చిన్న వయసులో, కొన్నిసార్లు గర్భంలోనే వీటి బారిన పడితే మెదడు ఎదుగుదల, శారీరక పెరుగుదల, పునరుత్పత్తి ఆరోగ్యంపై దీర్ఘకాల ప్రభావం ఉండొచ్చని తెలిపింది.

ఈ అంశాల్లో బలపడిన ఆధారాలు

సంతానోత్పత్తి, పునరుత్పత్తి అవయవాల ఎదుగుదల, మెదడు, నాడీ వ్యవస్థ, థైరాయిడ్‌ సహా ఇతర హార్మోన్లు, జీవక్రియ, రోగనిరోధక శక్తి, గుండె, రక్తనాళాల ఆరోగ్యంపై ప్రభావానికి ఆధారాలు బలపడ్డాయని నివేదిక తెలిపింది. జీవక్రియ సంబంధిత కాలేయ వ్యాధి, మూత్రపిండాలపై ఉండొచ్చని భావిస్తున్న ప్రభావం కొత్త ఆందోళనలని పేర్కొంది. అయితే శాస్త్రీయంగా ఇంకా తేలాల్సిన అంశాలున్నాయని పేర్కొంది.

ఈ రసాయనాలు ఎక్కువగా ప్లాస్టిక్‌ ప్యాకింగ్‌, బొమ్మలు, వైద్య పరికరాలు, పురుగుమందులు, సౌందర్య ఉత్పత్తుల్లో ఉంటాయని డబ్ల్యూహెచ్‌ఓ తెలిపింది. బిస్ఫినాల్‌-ఎ (బీపీఏ), థాలేట్లు, పీసీబీలు వీటికి ప్రధాన ఉదాహరణలు. ప్రపంచవ్యాప్తంగా 3,50,000కు పైగా రసాయనాలు, మిశ్రమాలు తయారీ, వాడకం కోసం నమోదై ఉన్నాయి. వాటిలో హార్మోన్లపై ప్రభావాన్ని పరీక్షించినవి కొన్నే. మనుషులు ఒకేసారి ఎన్నో రసాయనాల బారిన పడుతున్నా, నియంత్రణ సంస్థలు చాలావరకు ఒక్కో రసాయనాన్నే విడిగా అంచనా వేస్తున్నాయి.

‘‘ఈ రసాయనాల బారిన పడేది చాలావరకు రోజువారీ ఉత్పత్తుల ద్వారానే’’ అని యూఎన్‌ఈపీ పరిశ్రమలు, ఆర్థిక విభాగం డైరెక్టర్‌ షీలా అగర్వాల్‌ ఖాన్‌ అన్నారు. నిత్యం వాడే వస్తువుల్లోని రసాయనాలు ముఖ్యంగా గర్భిణులు, పిల్లలు, భావితరాలకు సురక్షితంగా ఉండేలా చూడాలని డబ్ల్యూహెచ్‌ఓ పర్యావరణ విభాగం తాత్కాలిక డైరెక్టర్‌ బ్రూస్‌ గోర్డన్‌ పేర్కొన్నారు.

పాల సీసాలపై బీఐఎస్‌ నిబంధన

మన దేశంలో భారతీయ ప్రమాణాల సంస్థ (బీఐఎస్‌) ఐఎస్‌ 14625:2015 ప్రమాణం కింద ధ్రువీకరించే ప్లాస్టిక్‌ పాల సీసాల్లో బీపీఏ ఉండకూడదు. డీఈహెచ్‌పీ అనే థాలేట్‌ సహా కొన్ని పదార్థాలు సీసా నుంచి ఎంత మేర బయటకు రావచ్చో ఈ ప్రమాణం సవరణలు పరిమితులు విధించాయి. వాటి అమలుపై బీఐఎస్‌ 2023 ఏప్రిల్‌ 6న మార్గదర్శకాలు ఇచ్చింది. సవరణలు లేని పాత ప్రమాణాన్ని 2023 సెప్టెంబరు 14 వరకే అనుమతించింది.

నియంత్రణ చర్యలతో కొన్ని పాత రసాయనాల దుష్ప్రభావాలు తగ్గిన ఉదాహరణలను నివేదిక ప్రస్తావించిందని డబ్ల్యూహెచ్‌ఓ తెలిపింది. సరైన సమాచారం అందితే ప్రజలు ప్రత్యామ్నాయ పదార్థాలను ఎంచుకోవచ్చని పేర్కొంది. ఆహార ప్యాకింగ్‌, బొమ్మలు, సౌందర్య ఉత్పత్తులు, దుస్తులు, వైద్యం, వ్యవసాయం, ఔషధాలు, వ్యర్థాల రంగాల్లో విధానకర్తలు తీసుకోవాల్సిన చర్యలతో యూఎన్‌ఈపీ మరో పత్రాన్ని విడుదల చేసింది. జెనీవాలో నవంబరు 16న మొదలైన రసాయనాలపై తొలి అంతర్జాతీయ సదస్సులో వీటిని ఆవిష్కరించారు. సదస్సు శుక్రవారం నవంబరు 20తో ముగుస్తుంది.

తెలుగు స్కోప్ ఇలస్ట్రేషన్.

The Scope Briefing, in your inbox

Five stories that matter, every morning — curated and verified by our editors.