Original bilingual journalism · English & తెలుగు
నాలుగు రాష్ట్రాల్లో జనగణన.. ఏపీ, తెలంగాణలో జనవరి 10 నుంచి
గోవా, పంజాబ్, ఉత్తర్ప్రదేశ్తో పాటు ఉత్తరాఖండ్లో మంచు ప్రభావం లేని ప్రాంతాల్లో జనగణన స్వీయ నమోదు నవంబరు 30 వరకు ఉంటుంది. ఆంధ్రప్రదేశ్, తెలంగాణలో 2027 జనవరి 10 నుంచి 24 వరకు ఈ అవకాశం ఉంటుంది.

దిల్లీ: జనగణన-2027 జనాభా లెక్కింపు మంచు ప్రాంతాలను దాటి మరో నాలుగు రాష్ట్రాలకు చేరింది. రిజిస్ట్రార్ జనరల్ గెజిట్ నోటిఫికేషన్ ప్రకారం.. రెండో దశ జనాభా గణనలో స్వీయ నమోదు సోమవారం (నవంబరు 16) మొదలైంది. గోవా, పంజాబ్, ఉత్తర్ప్రదేశ్తో పాటు ఉత్తరాఖండ్లో మంచు ప్రభావం లేని ప్రాంతాలు ఇందులో ఉన్నాయి. అక్కడి ప్రజలు నవంబరు 30 వరకు తమ వివరాలను తామే నమోదు చేసుకోవచ్చు.
2026 సెప్టెంబరు 5 నాటి ఈ నోటిఫికేషన్ ప్రకారం ఆ నాలుగు రాష్ట్రాల్లో 2026 డిసెంబరు 1 నుంచి 2027 జనవరి 4 వరకు ఇంటింటి గణన జరుగుతుంది. జనవరి 5 నుంచి 9 వరకు పునఃపరిశీలన ఉంటుంది. 2027 జనవరి 5న 00:00 గంటల నాటి జనాభానే లెక్కలోకి తీసుకుంటారు. ఎన్నికలు జరగనున్న ఈ నాలుగు రాష్ట్రాల్లో దేశవ్యాప్త షెడ్యూలు కంటే ముందే గణన చేపడుతున్నట్లు జనగణన వెబ్సైట్ పేర్కొంది.
తెలుగు రాష్ట్రాల్లో ఎప్పుడంటే..
ఆంధ్రప్రదేశ్, తెలంగాణ 2026 అక్టోబరు 30న నోటిఫై చేసిన దేశవ్యాప్త షెడ్యూలులో ఉన్నాయి. మణిపుర్ (తదుపరి ప్రకటన వచ్చే వరకు), పై నాలుగు రాష్ట్రాలు, లద్దాఖ్, హిమాచల్ప్రదేశ్, జమ్మూకశ్మీర్లోని మంచు ప్రాంతాలు మినహా మిగతా అన్ని చోట్లా 2027 జనవరి 10 నుంచి 24 వరకు స్వీయ నమోదు ఉంటుంది. జనవరి 25 నుంచి ఫిబ్రవరి 28 వరకు ఇంటింటి గణన, మార్చి 1 నుంచి 5 వరకు పునఃపరిశీలన జరుగుతాయి. 2027 మార్చి 1న 00:00 గంటల నాటి జనాభాను లెక్కిస్తారు.
కొండ ప్రాంతాలకు అందరికంటే ముందే షెడ్యూలు ఇచ్చారు. లద్దాఖ్తో పాటు జమ్మూకశ్మీర్, హిమాచల్ప్రదేశ్, ఉత్తరాఖండ్లోని మంచు ప్రాంతాల్లో 2026 సెప్టెంబరు 1 నుంచి 30 వరకు గణన, అక్టోబరు 1 నుంచి 5 వరకు పునఃపరిశీలన జరపాలని నోటిఫై చేశారు. అంతకుముందు ఆగస్టు 17-31 మధ్య స్వీయ నమోదుకు గడువు నిర్ణయించారు. వాటికి 2026 అక్టోబరు 1న 00:00 గంటలు ప్రామాణిక సమయం. దీంతో ఒకే జనగణనకు మూడు ప్రామాణిక తేదీలు ఏర్పడ్డాయి.
పత్రంలో 40 ప్రశ్నలు
2026 ఆగస్టు 14న నోటిఫై చేసిన గృహ పత్రంలో 40 అంశాలు ఉన్నాయి. పేరు, పుట్టిన తేదీ, వయసు, లింగం, వైవాహిక స్థితి, మతం వివరాలు అడుగుతారు. ‘ఎస్సీ/ఎస్టీ/కులం’ అనే అంశమూ ఉంది. వైకల్యం, మాతృభాష, అక్షరాస్యత, డిజిటల్ అక్షరాస్యత, చదువు, ఉపాధి, వలస వివరాలూ సేకరిస్తారు. పుట్టిన పిల్లలపై ప్రశ్నలు మహిళలకు మాత్రమే. కొవిడ్-19 టీకా ఎక్కడ వేయించుకున్నారు, ఎన్ని బ్యాంకు ఖాతాలు ఉన్నాయనీ అడుగుతారు. మొబైల్, ఆధార్, ఓటరు గుర్తింపు కార్డు నంబర్లను ‘అందుబాటులో ఉంటే’ నమోదు చేస్తారు. పాస్పోర్టు నంబరు భారత పాస్పోర్టుదారులకే. డ్రైవింగ్ లైసెన్సు ఉందా అనేది చివరి ప్రశ్న.
స్వీయ నమోదు పోర్టల్ (se.census.gov.in) లింకు, రిజిస్ట్రార్ జనరల్ గెజిట్ నోటిఫికేషన్లు జనగణన వెబ్సైట్లో ఉన్నాయి. ఆ నాలుగు రాష్ట్రాల్లో నవంబరు 30తో స్వీయ నమోదు ముగుస్తుంది. డిసెంబరు 1 నుంచి సిబ్బంది ఇళ్లకు వస్తారు.
More Stories
Nationalఐటీయూ మండలికి మళ్లీ భారత్.. ఆసియాలో మూడో స్థానం
Nationalపసిడి బాండ్ల ముందస్తు ఉపసంహరణ.. యూనిట్కు రూ.13,499
Nationalఏపీలో పెరిగిన మలేరియా.. 2025 మొత్తాన్ని మించిన కేసులు
Nationalడీజిల్ ఎగుమతులపై సుంకం పెంపు.. లీటరుకు రూ.14
Nationalఎస్ఎస్సీ ఎస్సై పరీక్ష.. 21 వేల మంది మెమో ఇవ్వాలి
Nationalయూపీఎస్సీలో 13 పోస్టులు.. డిసెంబరు 4 వరకు దరఖాస్తు
