Original bilingual journalism · English & తెలుగు
తీవ్ర వాయుగుండం.. 20న నెల్లూరు-తుని మధ్య తీరం దాటే అవకాశం
బంగాళాఖాతంలోని తీవ్ర వాయుగుండం విశాఖకు 730 కి.మీ. దూరంలో ఉంది. శుక్రవారం (నవంబరు 20) మధ్యాహ్నం సమయంలో అతి తీవ్ర తుపానుగా నెల్లూరు-తుని మధ్య ఏపీ, యానాం తీరాన్ని దాటే అవకాశం ఉందని ఐఎండీ తెలిపింది. ఆ సమయంలో గంటకు 120-130 కి.మీ., గరిష్ఠంగా 145 కి.మీ. వేగంతో గాలులు వీచొచ్చు.

తీవ్ర వాయుగుండంపై ఐఎండీ 8వ జాతీయ బులెటిన్ ఆధారంగా సోమవారం (నవంబరు 16) సాయంత్రం 5.10 గంటలకు ఈ వార్తను తాజాపరిచాం.
అమరావతి: బంగాళాఖాతంలోని తీవ్ర వాయుగుండం ఏపీ తీరాన్ని దాటే అవకాశం ఉందని భారత వాతావరణ శాఖ (ఐఎండీ) తెలిపింది. సోమవారం సాయంత్రం 4 గంటలకు విడుదల చేసిన 8వ జాతీయ బులెటిన్ ప్రకారం.. ఉదయం 11.30 గంటలకు ఇది విశాఖపట్నానికి దక్షిణ ఆగ్నేయంగా 730 కి.మీ., చెన్నైకి తూర్పు ఆగ్నేయంగా 650 కి.మీ. దూరంలో కేంద్రీకృతమై ఉంది. గత ఆరు గంటల్లో గంటకు 17 కి.మీ. వేగంతో ఉత్తర వాయవ్య దిశగా కదిలింది. ఏపీ, దక్షిణ ఒడిశా తీరాలకు తుపాను ముందస్తు నిఘా కొనసాగుతోంది.
సోమవారం సాయంత్రానికి ఇది తుపానుగా, మంగళవారం (నవంబరు 17) సాయంత్రానికి తీవ్ర తుపానుగా బలపడే అవకాశం ఉంది. ఆ తర్వాత మరింత బలపడి పశ్చిమ వాయవ్య దిశగా కదులుతూ శుక్రవారం (నవంబరు 20) మధ్యాహ్నం సమయంలో నెల్లూరు–తుని మధ్య ఏపీ, యానాం తీరాన్ని అతి తీవ్ర తుపానుగా దాటే అవకాశం ఉందని ఐఎండీ అంచనా వేసింది. ఆ సమయంలో గంటకు 120-130 కి.మీ., గరిష్ఠంగా 145 కి.మీ. వేగంతో గాలులు వీచొచ్చు.
తీరంలో వర్షాలు, పెనుగాలులు
కోస్తాంధ్రలో బుధవారం (నవంబరు 18) అక్కడక్కడ భారీ వర్షాలు పడొచ్చు. గురు, శుక్రవారాల్లో (నవంబరు 19, 20) కొన్నిచోట్ల భారీ నుంచి అతి భారీ వర్షాలు, అక్కడక్కడ 21 సెం.మీ.కు మించి అత్యంత భారీ వర్షాలు కురిసే అవకాశం ఉంది. రాయలసీమలో ఆ రెండు రోజులూ అక్కడక్కడ భారీ వర్షాలు పడొచ్చు.
అమరావతి వాతావరణ కేంద్రం నవంబరు 15న ఇచ్చిన జిల్లాల హెచ్చరికల ప్రకారం 19, 20 తేదీల్లో 13 జిల్లాలు, యానాంకు ఆరెంజ్ అలర్ట్ ఉంది. కాకినాడ, కోనసీమ, యానాంలో రెండు రోజులూ అత్యంత భారీ వర్షాలు పడొచ్చు.
తీరం వెంబడి మంగళవారం వరకు గంటకు 40-50 కి.మీ., గరిష్ఠంగా 60 కి.మీ. వేగంతో గాలులు వీచొచ్చు. గురువారం ఉదయం వరకు అవి 60-70 కి.మీ., గరిష్ఠంగా 80 కి.మీ.కు పెరగొచ్చు. గురువారం రాత్రి నుంచి శుక్రవారం మధ్యాహ్నం వరకు 120-130 కి.మీ., గరిష్ఠంగా 145 కి.మీ. వేగంతో పెనుగాలులు వీచొచ్చు. గురువారం సాయంత్రం నుంచి శుక్రవారం ఉదయం వరకు సముద్రం అత్యంత అల్లకల్లోలంగా మారి 9-14 మీటర్ల ఎత్తున అలలు ఎగసిపడొచ్చు. తీరం దాటే సమయంలో ప్రకాశం, బాపట్ల, కృష్ణా, పశ్చిమ గోదావరి, కోనసీమ, కాకినాడ జిల్లాల్లో లోతట్టు ప్రాంతాల్లోకి 1-1.5 మీటర్ల ఎత్తున సముద్రపు నీరు చొచ్చుకురావొచ్చని ఐఎండీ హెచ్చరించింది.
మత్స్యకారులు, తీర ప్రజలకు సూచనలు
నైరుతి బంగాళాఖాతంలో నవంబరు 19 వరకు, మధ్య బంగాళాఖాతంలో 16-20, వాయవ్య బంగాళాఖాతంలో 19, 20 తేదీల్లో వేటకు వెళ్లొద్దని ఐఎండీ సూచించింది. తీర ప్రాంతాల్లో గుడిసెల్లో ఉంటున్నవారిని సురక్షిత ప్రాంతాలకు తరలించాలని, ప్రభావిత ప్రాంతాల ప్రజలు ఇళ్లలోనే ఉండాలని పేర్కొంది. పూరిళ్లు, కచ్చా ఇళ్లు, పంటలు, అరటి, బొప్పాయి, కొబ్బరి చెట్లకు భారీ నష్టం వాటిల్లొచ్చని, రోడ్లు, రైళ్లు, విద్యుత్ లైన్లకు అంతరాయం కలగొచ్చని హెచ్చరించింది.
తెలంగాణలో శుక్రవారం తూర్పు జిల్లాల్లో అక్కడక్కడ భారీ నుంచి అతి భారీ వర్షాలు, శనివారం (నవంబరు 21) అక్కడక్కడ భారీ వర్షాలు పడొచ్చు. ఆదివారం నాటి అంచనాల కోసం రోజువారీ హెచ్చరికలు చూడొచ్చు. ఐఎండీ తదుపరి సందేశం సోమవారం రాత్రి 8.30 గంటలకు తుపాను పేజీలో వెలువడనుంది.
More Stories
Andhra Pradeshమత్స్యకారులు 20 వరకు వేటకు వెళ్లొద్దు
Andhra Pradeshమూడు పారిశ్రామిక నగరాలు.. రూ.31,360 కోట్ల పెట్టుబడుల అవకాశం
Andhra Pradeshముస్తాక్ అలీ ట్రోఫీ.. హిమాచల్ చేతిలో ఆంధ్ర ఓటమి
Andhra Pradeshపంచాయతీ రెండో విడత.. శ్రీకాకుళంలో అత్యధిక స్థానాలు
Andhra Pradeshప్రకాశం రైతుబిడ్డ.. 600 చిత్రాల గిరిబాబు ఇకలేరు
Andhra Pradeshబంగాళాఖాతంలో వాయుగుండం.. ఏ రోజు ఏ జిల్లాకు హెచ్చరిక
