భారత్ ఫ్యూచర్ సిటీలో స్పేస్ సిటీ: ఏడాదిలోగా అంతరిక్ష సాంకేతిక విధానం అన్న మంత్రి శ్రీధర్ బాబు; హైదరాబాద్‌లో కాస్మోసర్వ్ ‘బేస్ 1’ ప్రారంభం

భారత్ ఫ్యూచర్ సిటీలో అంతరిక్ష సాంకేతిక సంస్థల కోసం ప్రత్యేకంగా స్పేస్ సిటీ ఏర్పాటు చేస్తామని ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు ప్రకటించారు. హైదరాబాద్‌కు చెందిన అంకుర సంస్థ కాస్మోసర్వ్ స్పేస్ నెలకొల్పిన ‘బేస్ 1′ కేంద్రాన్ని నవంబర్ 5 గురువారం ఆయన ప్రారంభించారు. స్పేస్‌టెక్ సంస్థలు, పరిశ్రమలు, ఆవిష్కర్తలకు పరిశోధన, ఇంక్యుబేషన్ వసతులు ఒకేచోట అందించడమే స్పేస్ సిటీ ఉద్దేశమని చెప్పారు.

రాష్ట్రానికి ప్రత్యేక అంతరిక్ష సాంకేతిక విధానాన్ని ఏడాదిలోగా తీసుకొస్తామని మంత్రి తెలిపారు. శాస్త్రవేత్తలు, పరిశ్రమ ప్రతినిధులు, నిపుణుల సూచనలు తీసుకుని దాన్ని రూపొందిస్తామన్నారు. హైదరాబాద్‌లో ఇప్పటికే 30కి పైగా స్పేస్‌టెక్ సంస్థలు పనిచేస్తున్నాయని, దేశంలో తొలి స్పేస్‌టెక్ యూనికార్న్ కూడా ఇక్కడిదేనని గుర్తుచేశారు. నగరంలో 52 జాతీయ ప్రయోగశాలలు, 15 లక్షల మంది ఇంజినీర్లు ఉన్నారని, ఈ సంస్థలకు కావాల్సిన విడిభాగాల్లో దాదాపు 90 శాతం స్థానికంగానే దొరుకుతున్నాయని వివరించారు.

ఉపగ్రహాల సర్వీసింగ్ కోసం ‘బేస్ 1′

కక్ష్యలో తిరుగుతున్న ఉపగ్రహాలకు సేవలు, అంతరిక్ష వ్యర్థాల తొలగింపు, ఉపగ్రహాల జీవితకాలం పెంచడంపై కాస్మోసర్వ్ పనిచేస్తోంది. సుమారు 14,800 చదరపు అడుగుల బేస్ 1లో అంతరిక్ష రోబోలను తయారుచేసి, అంతరిక్షం లాంటి పరిస్థితుల్లో పరీక్షిస్తారు. మిషన్ కంట్రోల్ కూడా ఇక్కడే ఉంటుంది. ఈ తరహా ప్రైవేటు కేంద్రం దేశంలో ఇదే మొదటిదని, ప్రపంచంలో ఆరోదని సంస్థ తెలిపింది. 60 లక్షల డాలర్ల సీడ్ నిధుల సమీకరణతో సంస్థ మొత్తం నిధులు 90 లక్షల డాలర్లు దాటాయి. సంస్థ వ్యవస్థాపకుడు, సీఈవో డాక్టర్ చిరంజీవి ఫణీంద్ర.

కార్యక్రమంలో వర్చువల్‌గా పాల్గొన్న కేంద్ర శాస్త్ర, సాంకేతిక శాఖ సహాయ మంత్రి జితేంద్ర సింగ్, 2030 నాటికి అంతరిక్షాన్ని వ్యర్థాలు లేకుండా చేయాలన్న లక్ష్యంతో దేశం పనిచేస్తోందని చెప్పారు. స్పేస్ సిటీ విస్తీర్ణం, పనులు ఎప్పుడు మొదలవుతాయన్న వివరాలను ప్రభుత్వం ఇంకా వెల్లడించలేదు.