శుక్రవారం విడుదలలు: థియేటర్లలో సూర్య ‘సీన్’, ‘సమ్మర్ హాలిడేస్’, నయనతార ‘మహాశక్తి’; ఓటీటీలో తెలుగులోనూ ‘ఐ యామ్ గేమ్’

నవంబర్ 6 శుక్రవారం విడుదలలు మూడు. సూర్య హీరోగా నటించిన క్రైమ్ థ్రిల్లర్ ‘సీన్‘ తెలుగు, తమిళ భాషల్లో రెండు రాష్ట్రాల్లోని థియేటర్లకు వస్తోంది. అదే రోజు తెలుగు కుటుంబ కథాచిత్రం ‘సమ్మర్ హాలిడేస్‘, నయనతార ‘మహాశక్తి‘ కూడా విడుదలవుతున్నాయి. ఓటీటీలో దుల్కర్ సల్మాన్ ‘ఐ యామ్ గేమ్‘ తెలుగులోనూ అందుబాటులోకి వస్తోంది. దీపావళి పండుగ నవంబర్ 8 ఆదివారం.

‘ఆవేశం‘ సినిమాతో పేరు తెచ్చుకున్న మలయాళ దర్శకుడు జీతూ మాధవన్ తీసిన తొలి తమిళ చిత్రం ‘సీన్‘. ఖైదీలు సైతం జడుసుకునే ఇన్‌బరాజ్ అనే పోలీసు అధికారిగా సూర్య కనిపిస్తారు. నజ్రియా నజీమ్ కథానాయిక, నస్లెన్ ప్రతినాయకుడు. సూర్య, జ్యోతిక నిర్మించారు. సుశిన్ శ్యామ్ సంగీతం సమకూర్చారు. సినిమాకు యూఏ 16+ సర్టిఫికెట్ వచ్చింది. నిడివి 2 గంటల 29 నిమిషాలు. తెలుగు రాష్ట్రాల్లో ఎన్వీఆర్ సినిమా సంస్థ విడుదల చేస్తోంది.

గోదావరి పల్లెలో వేసవి సెలవులు

‘సమ్మర్ హాలిడేస్‘ స్ట్రెయిట్ తెలుగు సినిమా. శ్రీకర్ నయన్ జి దర్శకత్వంలో ధీరజ్ మొగిలినేని ఎంటర్‌టైన్‌మెంట్స్ నిర్మించింది. కథ 2000 సంవత్సరం వేసవిలో నడుస్తుంది. సెలవులకు గోదావరి ప్రాంతంలోని అమ్మమ్మ ఊరికి వెళ్లిన పట్నం పిల్లాడికి, ఆ ఊళ్లో పేపర్ వేసే కుర్రాడితో స్నేహం కుదురుతుంది. మాస్టర్ రోహన్ రాయ్, మాస్టర్ అరుణ్ దేవ్ పోతుల ఆ ఇద్దరు పిల్లలుగా నటించారు. జయసుధ, రాజీవ్ కనకాల, హర్షవర్ధన్ ఇతర పాత్రల్లో కనిపిస్తారు. సింజిత్ యెర్రమిల్లి సంగీతం అందించారు.

సుందర్ సి దర్శకత్వంలో వచ్చిన తమిళ చిత్రం ‘మూకుత్తి అమ్మన్ 2′ తెలుగులో ‘మహాశక్తి‘ పేరుతో వస్తోంది. అమ్మవారిగా నయనతార మళ్లీ కనిపిస్తారు. రెజీనా కసాండ్రా ప్రతినాయిక. దునియా విజయ్, యోగిబాబు, ఊర్వశి ఇతర పాత్రలు పోషించారు. గురువారం విడుదలైన ‘రామాయణ: పార్ట్ 1′ థియేటర్లలో రెండో రోజుకు చేరుతోంది.

ఓటీటీలో కొత్తగా

‘ఆర్‌డీఎక్స్‘ దర్శకుడు నహాస్ హిదాయత్ తీసిన మలయాళ యాక్షన్ థ్రిల్లర్ ‘ఐ యామ్ గేమ్‘ నవంబర్ 6 నుంచి జియోహాట్‌స్టార్‌లో తెలుగు, తమిళం, కన్నడ, హిందీ భాషల్లోనూ చూడొచ్చు. దుల్కర్ హీరోగా నటించడంతో పాటు తన వేఫేరర్ ఫిల్మ్స్ పతాకంపై నిర్మించారు. అదే రోజు హిప్‌హాప్ తమిళా ఆది ‘మీసయ మురుక్కు 2′ సోనీలివ్‌లో తెలుగు డబ్బింగ్‌తో వస్తోంది. అనీశ్, అనశ్వర రాజన్ జంటగా నటించిన ‘ఇట్లు అర్జున‘ నవంబర్ 13 శుక్రవారం థియేటర్లలోకి రానుంది.