ఓటీటీ: నవంబర్ 6 నుంచి జియోహాట్‌స్టార్‌లో దుల్కర్ ‘ఐ యామ్ గేమ్’ తెలుగులోనూ; అదే రోజు సోనీలివ్‌లో ‘మీసయ మురుక్కు 2’

దుల్కర్ సల్మాన్ హీరోగా నటించిన మలయాళ యాక్షన్ థ్రిల్లర్ ‘ఐ యామ్ గేమ్‘ నవంబర్ 6 శుక్రవారం నుంచి జియోహాట్‌స్టార్‌లో స్ట్రీమ్ కానుంది. మలయాళంతో పాటు తెలుగు, తమిళం, హిందీ, కన్నడ భాషల్లోనూ సినిమా అందుబాటులో ఉంటుందని జియోహాట్‌స్టార్ అధికారికంగా ప్రకటించింది. థియేటర్లలో విడుదలైన సుమారు రెండు నెలలకు సినిమా ఓటీటీకి వస్తోంది.

‘ఆర్‌డీఎక్స్‘ ఫేమ్ నహాస్ హిదాయత్ దర్శకత్వంలో వచ్చిన ఈ సినిమాను దుల్కర్, జోమ్ వర్గీస్ కలిసి వేఫేరర్ ఫిల్మ్స్ పతాకంపై నిర్మించారు. అదృష్టాన్నే నమ్ముకుని జూదమాడే యువకుడు అనుకోని చిక్కుల్లో పడటం కథ. కయాదు లోహర్, ఆంటోనీ వర్గీస్, కదిర్, సంయుక్తా విశ్వనాథన్ ముఖ్య పాత్రల్లో నటించారు. తమిళ దర్శకుడు మిస్కిన్ ప్రతినాయకుడిగా ఈ సినిమాతోనే మలయాళంలో నటుడిగా అడుగుపెట్టారు. జేక్స్ బిజోయ్ సంగీతం అందించగా, అన్బరివ్ ద్వయం పోరాటాలు సమకూర్చింది.

సోనీలివ్‌లో ‘మీసయ మురుక్కు 2′

అదే రోజు హిప్‌హాప్ తమిళా ఆది నటించిన తమిళ సినిమా ‘మీసయ మురుక్కు 2′ సోనీలివ్‌లో విడుదలవుతోంది. తమిళంతో పాటు డబ్బింగ్ వెర్షన్లు కూడా అందుబాటులో ఉంటాయి. ఉత్తర చెన్నై వీధుల్లో పుట్టిన గానా పాటను ప్రపంచ వేదికకు తీసుకెళ్లాలని తపించే మూడు తరాల కుటుంబం కథ ఇది. కథ, దర్శకత్వం, సంగీతం ఆదివే. కేతికా శర్మ, చైత్ర జె. ఆచార్ ఇతర పాత్రల్లో కనిపిస్తారు.