ఏపీలో కృత్రిమ పన్నీర్‌పై ఏడాది పాటు నిషేధం: తయారీ, నిల్వ, రవాణా, అమ్మకాలు బంద్

ఆంధ్రప్రదేశ్‌లో కృత్రిమ పన్నీర్‌పై రాష్ట్ర ప్రభుత్వం ఏడాది పాటు నిషేధం విధించింది. పాలు లేకుండా తయారయ్యే ఈ పన్నీర్‌ను తయారు చేయడం, నిల్వ ఉంచడం, రవాణా చేయడం, అమ్మడం ఇక కుదరదు. ఆహార భద్రత కమిషనర్ జి. వీరపాండియన్ పేరుతో ఈ మేరకు రాష్ట్ర గెజిట్‌లో నోటిఫికేషన్ వెలువడింది.

అసలు పన్నీర్‌ను పాలతో తయారు చేస్తారు. కృత్రిమ పన్నీర్ చూడటానికి అచ్చం అలాగే ఉంటుంది. కానీ పాలకు బదులు వృక్ష సంబంధ కొవ్వులు, నూనెలతో దీన్ని తయారు చేస్తారు. ప్రజారోగ్యాన్ని కాపాడేందుకు, కొనుగోలుదారులు మోసపోకుండా చూసేందుకే ఈ నిషేధం విధించినట్లు అధికారులు తెలిపారు. పాలతో చేయని ఉత్పత్తిని అసలు పన్నీర్‌గా అమ్మకూడదని నోటిఫికేషన్ స్పష్టం చేసింది.

పొరుగు రాష్ట్రాల్లోనూ ఇదే దారి

తెలంగాణలో ఇలాంటి ఏడాది నిషేధం 2026 సెప్టెంబర్ 10 నుంచే అమల్లో ఉంది. ఆహార భద్రత, ప్రమాణాల చట్టం-2006లోని సెక్షన్ 30(2)(ఎ) కింద అక్కడ ఉత్తర్వులు ఇచ్చారు. మహారాష్ట్రలో ఏడాది నిషేధం 2026 జూలై 30న గెజిట్‌లో ప్రచురితమైంది.

కేంద్ర స్థాయిలోనూ కసరత్తు జరుగుతోంది. పాలతో తయారు కాని ఉత్పత్తుల పేర్లు, లేబుళ్లు, ప్రచారంలో “పన్నీర్” అనే పదం వాడకూడదంటూ భారత ఆహార భద్రత, ప్రమాణాల సంస్థ (ఎఫ్ఎస్ఎస్ఏఐ) సెప్టెంబర్ 22 తేదీతో ముసాయిదా సవరణ విడుదల చేసింది. గెజిట్‌లో ప్రచురించిన నాటి నుంచి 60 రోజుల పాటు దీనిపై అభ్యంతరాలు, సూచనలు స్వీకరిస్తుంది. ఆ తర్వాతే తుది నిబంధన వస్తుంది.

కొన్న పన్నీర్ లేదా హోటల్‌లో వడ్డించిన పన్నీర్ కల్తీదని అనుమానం వస్తే ఎఫ్ఎస్ఎస్ఏఐ 24 గంటల టోల్ ఫ్రీ నంబర్ 1800112100కు ఫోన్ చేయవచ్చు. సంస్థ మొబైల్ యాప్, వెబ్ పోర్టల్ ద్వారానూ ఫిర్యాదు చేయవచ్చు.