రేషన్ కార్డుదారులకు కిలో కందిపప్పు రూ.100కే: లీటర్ పామాయిల్ రూ.125, కిలో గోధుమ పిండి రూ.25; దీపావళి లోపే అందించాలని సీఎం ఆదేశం

రేషన్ కార్డుదారులకు దీపావళి లోపే తక్కువ ధరకు కందిపప్పు, పామాయిల్, గోధుమ పిండి అందించాలని ముఖ్యమంత్రి చంద్రబాబు నాయుడు అధికారులను ఆదేశించారు. నిత్యావసర సరకుల ధరలపై అక్టోబర్ 27న ఉండవల్లిలోని తన క్యాంపు కార్యాలయంలో ఆయన సమీక్ష నిర్వహించారు. ప్రధాన కార్యదర్శి జి. సాయిప్రసాద్, పౌరసరఫరాల శాఖ కార్యదర్శి కన్నబాబు ఇందులో పాల్గొన్నారు.

రేషన్ దుకాణాల ద్వారా నెలకు కిలో కందిపప్పు రూ.100కే ఇస్తారు. బహిరంగ మార్కెట్‌లో ఇప్పుడు కిలో కందిపప్పు రూ.170 నుంచి రూ.200 వరకు పలుకుతోంది. అంటే కార్డుదారులకు కిలోకు రూ.70 నుంచి రూ.100 వరకు ఆదా అవుతుంది. లీటర్ పామాయిల్ రూ.125కు, కిలో గోధుమ పిండి రూ.25కు అందుతాయి. పామాయిల్‌ను టెండర్ల ద్వారా కొనాలని సీఎం సూచించారు. దీనివల్ల ప్రభుత్వంపై నెలకు సుమారు రూ.100 కోట్ల అదనపు భారం పడుతుందని అధికారులు చెప్పగా, ఆ భారాన్ని ప్రభుత్వమే భరిస్తుందని చంద్రబాబు స్పష్టం చేశారు. ఇందుకు కేంద్ర సాయం కూడా కోరాలని అధికారులకు చెప్పారు. ఇదే సమయంలో ఎన్టీఆర్ భరోసా పింఛన్లు అక్టోబర్ 30 నుంచే ఇళ్ల వద్ద పంపిణీ కానున్నాయి.

రేషన్ కార్డుదారులకు ఊరట; బియ్యం, ఉల్లి ధరలపైనా దృష్టి

రైతు బజార్లలో అమ్ముతున్న ‘ధరణి’ బియ్యాన్ని ఇకపై మున్సిపాలిటీలు, మండల కేంద్రాల్లో, సంచార వాహనాల ద్వారా కూడా అమ్ముతారు. కిలో సన్న బియ్యం రూ.49కి, సూపర్ ఫైన్ రకం రూ.50కి దొరుకుతాయి. బీపీటీ స్టీమ్ బియ్యాన్ని కిలో రూ.66కు, సాధారణ స్టీమ్ బియ్యాన్ని రూ.47కు మించకుండా అమ్మేందుకు మిల్లర్లు అంగీకరించారు.

రైతు బజార్లలో కిలో ఉల్లి రూ.35కు అమ్ముతుండగా, మరో 800 టన్నులు కొనాలని నిర్ణయించారు. రాష్ట్రం నుంచి ధాన్యం బయటకు వెళ్లకుండా చెక్‌పోస్టుల దగ్గర నిఘా పెట్టాలని, మార్కెట్ సెస్‌ను సమీక్షించాలని సీఎం అధికారులను ఆదేశించారు.