జీఎస్‌ఐ శిక్షణ సంస్థలో కొత్త వసతులు.. ప్రారంభించనున్న కిషన్‌రెడ్డి

హైదరాబాద్‌: బండ్లగూడ–నాగోల్‌లోని జీఎస్‌ఐ శిక్షణ సంస్థలో మూడు కొత్త వసతులు సిద్ధమయ్యాయి. కేంద్ర బొగ్గు, గనుల శాఖ మంత్రి జి.కిషన్‌రెడ్డి మంగళవారం (నవంబరు 10) ఉదయం 9.30 గంటలకు వాటిని ప్రారంభిస్తారు. అంతర్జాతీయ వసతి గృహం, అధునాతన జియోఫిజికల్‌ డేటా ప్రాసెసింగ్‌ ప్రయోగశాల, డిజిటల్‌ స్టూడియోలకు మొత్తం రూ.9.12 కోట్లు ఖర్చయింది. ఈ మేరకు కేంద్ర గనుల శాఖ సోమవారం ప్రకటన విడుదల చేసింది.

భారత భూగర్భ సర్వేక్షణ సంస్థ (జీఎస్‌ఐ) సొంత నిధులు రూ.4.27 కోట్లతో వసతి గృహాన్ని నిర్మించింది. దానికి నలంద, తక్షశిల అని పేర్లు పెట్టారు. ఇందులో అన్ని హంగులతో 32 సూట్‌లు ఉన్నాయి. భోజనశాల, వ్యాయామశాల, వినోద గది, చిన్న గ్రంథాలయం, లాండ్రీ కూడా ఏర్పాటు చేశారు. విదేశాంగ శాఖ సూచనల మేరకు దీన్ని తీర్చిదిద్దారు. విదేశాల నుంచి వచ్చే శిక్షణార్థులు ఇక్కడ బస చేస్తారు.

ప్రయోగశాలలో 25 అధునాతన కంప్యూటర్లు

ప్రయోగశాలకు రూ.4.55 కోట్లు వెచ్చించారు. ఈ నిధులను జీఎస్‌ఐ, ఎన్‌ఎంఈడీటీ సమకూర్చాయి. ఇందులో 25 అధునాతన కంప్యూటర్లు, కొత్త సాఫ్ట్‌వేర్‌ ఉన్నాయి. భూభౌతిక సర్వే సమాచారాన్ని విశ్లేషించి నమూనాలు రూపొందించేందుకు ఇవి పనికొస్తాయి. ఖనిజ అన్వేషణకు ఇది తోడ్పడుతుందని గనుల శాఖ పేర్కొంది. డిజిటల్‌ స్టూడియోను రూ.30 లక్షలతో ఏర్పాటు చేశారు. దీనికి జీఎస్‌ఐతో పాటు సామర్థ్య నిర్మాణ కమిషన్‌ సహకారం అందించింది. ఇక్కడ వీడియో పాఠాలు, పాడ్‌కాస్ట్‌లు, వెబినార్లు రూపొందిస్తారు. వాటిని ‘ఐగాట్‌ కర్మయోగి’ పోర్టల్‌లో ఉంచుతారు.

75 దేశాల నిపుణులకు శిక్షణ

ఈ శిక్షణ సంస్థ 1976లో మొదలైంది. దీని ప్రధాన కార్యాలయం హైదరాబాద్‌లోనే ఉంది. దేశవ్యాప్తంగా ఆరు ప్రాంతీయ శిక్షణ విభాగాలు, నాలుగు క్షేత్ర శిక్షణ కేంద్రాలు ఉన్నాయి. విదేశాంగ శాఖ ‘ఐటెక్‌’ కార్యక్రమం కింద అభివృద్ధి చెందుతున్న దేశాల భూవిజ్ఞాన నిపుణులకూ ఇక్కడ శిక్షణ ఇస్తారు. 2023 జూన్‌ నాటికి 75 దేశాల నిపుణులు ఇక్కడ శిక్షణ పొందారు. బంగారం, వజ్రాలు, రాగి, లిథియం, అరుదైన భూమూలకాల అన్వేషణ పద్ధతులనూ నేర్పిస్తారు.

మంగళవారం కార్యక్రమం వసతి గృహం ప్రారంభంతో మొదలవుతుంది. తర్వాత ప్రయోగశాల, స్టూడియోలను ప్రారంభిస్తారు. జీఎస్‌ఐ డైరెక్టర్‌ జనరల్‌ దినేశ్‌ వి.గన్వీర్‌ స్వాగతోపన్యాసం చేస్తారు. మల్కాజిగిరి ఎంపీ ఈటల రాజేందర్‌, మంత్రి కిషన్‌రెడ్డి ప్రసంగిస్తారు. గనుల శాఖ సంయుక్త కార్యదర్శి ఫరీదా ఎం.నాయక్‌ కూడా పాల్గొంటారు.