Original bilingual journalism · English & తెలుగు
హార్ముజ్లో ట్యాంకర్పై దాడి.. ఒక భారతీయ నావికుడి గల్లంతు
హార్ముజ్ జలసంధిలో ఎల్పీజీ ట్యాంకర్పై దాడిని భారత్ ఖండించింది. నౌకలోని 24 మంది భారతీయుల్లో 21 మంది ఒమన్లో సురక్షితంగా ఉన్నారు. ఇద్దరు ఆసుపత్రిలో ఉండగా, ఒకరి జాడ తెలియలేదు.

హార్ముజ్ జలసంధిలో దాడికి గురైన ఎల్పీజీ ట్యాంకర్ ‘ఎంటీ తారా గ్యాస్’లోని ఒక భారతీయ నావికుడి ఆచూకీ ఇంకా తెలియలేదు. ఈ దాడిని భారత్ తీవ్రంగా ఖండించింది. విదేశీ వ్యవహారాల మంత్రిత్వ శాఖ మంగళవారం (నవంబరు 17) ఈ మేరకు ప్రకటన విడుదల చేసింది. పనామా జెండాతో తిరుగుతున్న ఈ నౌకపై నవంబరు 16న దాడి జరిగింది.
నౌకలో మొత్తం 24 మంది భారతీయులు ఉన్నారు. వీరిలో 21 మందిని ఒమన్లోని ఖసబ్ రేవుకు సురక్షితంగా చేర్చారు. గాయపడిన ఇద్దరు సిబ్బంది ఆసుపత్రిలో చికిత్స పొందుతున్నారు. మరొకరి జాడ దొరకలేదు. సిబ్బంది పేర్లు, వారి సొంత రాష్ట్రాలను మంత్రిత్వ శాఖ వెల్లడించలేదు. దాడి ఎవరు చేశారో కూడా చెప్పలేదు.
ఒమన్ అధికారులతో కలిసి సాగుతున్న గాలింపు, సహాయ చర్యలను మస్కట్లోని భారత రాయబార కార్యాలయం దగ్గరుండి పర్యవేక్షిస్తోంది. సకాలంలో సాయం అందించిన ఒమన్ ప్రభుత్వానికి భారత్ కృతజ్ఞతలు తెలిపింది.
నౌకలపై దాడులు ఆగాలి
ఈ సముద్ర ప్రాంతంలో వాణిజ్య నౌకలపై వరుస దాడులు తీవ్ర ఆందోళన కలిగిస్తున్నాయని మంత్రిత్వ శాఖ పేర్కొంది. పౌర నావికుల ప్రాణాలకు ఇవి పెను ముప్పుగా మారాయని తెలిపింది. వాణిజ్య నౌకలు, పౌర మౌలిక సదుపాయాలపై దాడులు ఆగిపోవాలని స్పష్టం చేసింది. అంతర్జాతీయ చట్టాలకు అనుగుణంగా సముద్ర మార్గాల్లో స్వేచ్ఛగా రాకపోకలు, వాణిజ్యం త్వరగా పునరుద్ధరించాలని కోరింది.
హార్ముజ్ జలసంధి వాణిజ్య నౌకల సిబ్బందికి ప్రమాదకర మార్గంగా మారింది. నవంబరు 11 వరకు ఈ జలసంధి, పశ్చిమాసియా సముద్రాల్లో 134 ఘటనలు జరిగాయి. వాటిలో 25 మంది నావికులు ప్రాణాలు కోల్పోయారు. ఐరాస సహాయ ప్రధాన కార్యదర్శి ఖాలిద్ ఖియారీ నవంబరు 13న భద్రతా మండలికి ఈ వివరాలు తెలిపారు. అంతర్జాతీయ సముద్రయాన సంస్థ లెక్కల ఆధారంగా ఆయన ఈ సంఖ్యలు చెప్పారు.
కుటుంబాలు ఎవరిని సంప్రదించాలి
నావికుల కుటుంబ సభ్యులు మస్కట్లోని భారత రాయబార కార్యాలయాన్ని +968 24695981 నంబరులో సంప్రదించవచ్చు. ఒమన్లో ఉన్నవారు 80071234 టోల్ఫ్రీ నంబరుకు ఫోన్ చేయవచ్చు. ఈ లైనులో పలు భాషల్లో మాట్లాడవచ్చని విదేశీ వ్యవహారాల శాఖ గల్ఫ్ హెల్ప్లైన్ల జాబితా చెబుతోంది. భారత సముద్ర పరిపాలన డైరెక్టరేట్ జనరల్ నడిపే నావికుల సమాచార కేంద్రాన్ని +91 86575 49760 నంబరులో ఫోన్ లేదా వాట్సాప్ ద్వారా సంప్రదించవచ్చు.
More Stories
Internationalఆసియాన్ పర్యాటకులకు ఉచిత ఈ-వీసా.. మోదీ ప్రతిపాదన
Internationalమనీలా ఖల్సా దివాన్ గురుద్వారా పునర్నిర్మాణానికి మోదీ శంకుస్థాపన
Internationalమనీలాలో ఆసియాన్-భారత్ సదస్సు.. మోదీ హాజరు
Internationalఅమెరికా, ఆస్ట్రేలియాల్లో భారత కాన్సులర్ శిబిరాలు
Internationalముంబయిలో ప్రిన్స్ విలియం దంపతులు.. ఎర్త్షాట్ పురస్కారాలు
Internationalబ్రిటన్లో శాశ్వత నివాసం.. పదేళ్ల నిరీక్షణ
