Original bilingual journalism · English & తెలుగు
కపిలేశ్వరాలయంలో కాలభైరవ హోమం.. 18 నుంచి చండీహోమం
తిరుపతి కపిలేశ్వరస్వామి ఆలయంలో కార్తీక హోమ మహోత్సవాల్లో భాగంగా మంగళవారం కాలభైరవస్వామి హోమం జరుగుతుంది. దంపతులు రూ.500 చెల్లించి పాల్గొనవచ్చు.

తిరుపతి: కపిలతీర్థంలోని శ్రీ కపిలేశ్వరస్వామి ఆలయంలో మంగళవారం (నవంబరు 17) కాలభైరవ హోమం జరుగుతుంది. తిరుమల తిరుపతి దేవస్థానం (టీటీడీ) నవంబరు 10న అంకురార్పణతో ప్రారంభించిన కార్తీక మాస హోమ మహోత్సవాల్లో ఇది భాగం. ఈ ఉత్సవాలు డిసెంబరు 8 వరకు సాగుతాయి.
సోమవారం ఆలయంలో శ్రీ దక్షిణామూర్తి హోమం వైదిక పద్ధతిలో జరిగింది. యాగశాలలో ఉదయం 9 గంటలకు మొదలైన పూజలు, హోమం, పూర్ణాహుతి మధ్యాహ్నం 12 గంటల వరకు సాగాయి. ఆ తర్వాత మహాశాంతి అభిషేకం, దక్షిణామూర్తికి కలశాభిషేకం చేశారు. సాయంత్రం 6 గంటలకు కాలభైరవస్వామికి కలశస్థాపన, దీపారాధన జరిపారు. ఆలయ డిప్యూటీ ఈవో నాగరత్న, ఏఈవో కుమారి దేవి పాల్గొన్నారు.
ఒక రోజు హోమంలో పాల్గొనాలనుకునే దంపతులు రూ.500 చెల్లించాలి. వారికి ఉత్తరీయం, రవికె అందజేసి అన్నప్రసాదం పెడతారు. హోమానికి వచ్చేవారు సంప్రదాయ దుస్తుల్లోనే రావాలని టీటీడీ స్పష్టం చేసింది.
బుధవారం నుంచి చండీహోమం
నవంబరు 18 నుంచి 26 వరకు శ్రీ కామాక్షి అమ్మవారి హోమం (చండీహోమం) ఉంటుంది. నవంబరు 27 నుంచి డిసెంబరు 7 వరకు కపిలేశ్వరస్వామి హోమం (రుద్రహోమం) నిర్వహిస్తారు. మాస శివరాత్రి అయిన డిసెంబరు 7న శివపార్వతుల కల్యాణోత్సవం జరుగుతుంది. ఈ కల్యాణంలోనూ దంపతులు రూ.500తో పాల్గొనవచ్చు.
డిసెంబరు 8న చండికేశ్వరస్వామి హోమం, త్రిశూలస్నానం, పంచమూర్తుల తిరువీధి ఉత్సవంతో వేడుకలు ముగుస్తాయి. సొంతంగా హోమం చేయించుకోవడం ఖర్చుతో కూడిన పని. అందుకే భక్తుల సౌలభ్యం కోసం 2012 నుంచి ఈ హోమాలను సామూహికంగా జరుపుతున్నట్లు టీటీడీ తెలిపింది. ఏటా ఈ హోమాల్లో పాల్గొనే భక్తుల సంఖ్య పెరుగుతోందని పేర్కొంది.
More Stories
Devotionalకొండగట్టు అంజన్న ఆలయంలో 60 ఏళ్ల తర్వాత చందనోత్సవం.. 20న మహా సంప్రోక్షణ, ఆపై నిజరూప దర్శనం
Andhra Pradeshడిసెంబరు 20-29 వరకు వైకుంఠ ద్వార దర్శనం.. 8.34 లక్షల మందికి, సామాన్య భక్తులకు 92% ప్రాధాన్యం
Devotionalపద్మావతి అమ్మవారికి రూ.10 లక్షల బంగారు డాలర్
Devotionalకార్తీక తొలి సోమవారం.. తిరుమలలో పుష్పయాగం
Devotionalతిరుమలలో పెరిగిన రద్దీ.. సర్వదర్శనానికి 18 గంటలు
Devotionalశ్రీవారి ఫిబ్రవరి కోటా.. 18 నుంచి ఆన్లైన్లో
