నాలుగో వన్డేకు శ్రేయస్‌ సారథ్యం.. జట్టులోకి తిలక్‌

మౌంట్‌ మాంగనూయ్‌: న్యూజిలాండ్‌ పర్యటనలో వన్డే సిరీస్‌ను ముగించేందుకు కొత్త రూపంలోని భారత జట్టు సిద్ధమైంది. నాలుగో వన్డే శుక్రవారం (నవంబరు 13) బే ఓవల్‌ వేదికగా జరగనుంది. ఈ మ్యాచ్‌కు శ్రేయస్‌ అయ్యర్‌ కెప్టెన్‌. హైదరాబాద్‌ బ్యాటర్‌ తిలక్‌ వర్మ జట్టులోకి వచ్చాడు. భారత కాలమానం ప్రకారం ఉదయం 7.30 గంటలకు ఆట మొదలవుతుంది. ఐదు మ్యాచ్‌ల సిరీస్‌లో టీమ్‌ఇండియా 2-0తో ముందుంది.

హామిల్టన్‌లో మంగళవారం జరగాల్సిన మూడో వన్డే వర్షంతో ఒక్క బంతి పడకుండానే రద్దయింది. దీంతో కివీస్‌కు సిరీస్‌ గెలిచే దారి మూసుకుపోయింది. చివరి రెండూ గెలిచినా 2-2తో సమం చేయగలదు. ఈ రెండు మ్యాచ్‌లకు బీసీసీఐ అక్టోబరు 30న జట్టును ప్రకటించింది. టెస్టు జట్టులో ఉన్న గిల్‌, కేఎల్‌ రాహుల్‌, అన్షుల్‌ కాంబోజ్‌ ఇందులో లేరు. తిలక్‌తో పాటు కుమార్‌ కుశాగ్ర, యశ్‌ ఠాకూర్‌ వచ్చారు. ఇషాన్‌ కిషన్‌ వైస్‌ కెప్టెన్‌. హైదరాబాద్‌ పేసర్‌ సిరాజ్‌ జట్టులోనే కొనసాగుతున్నాడు.

కివీస్‌ జట్టులో కొత్త పేసర్‌

ఆతిథ్య జట్టు కూడా మార్పులు చేసింది. సెంట్రల్‌ డిస్ట్రిక్ట్స్‌ పేసర్‌ బ్రెట్‌ రాండెల్‌ను గురువారం జట్టులోకి తీసుకుంది. 31 ఏళ్ల రాండెల్‌కు ఇదే తొలి అంతర్జాతీయ పిలుపు. అతడు ఇటీవల ఇంగ్లాండ్‌లో డెర్బీషైర్‌ తరఫున కౌంటీ క్రికెట్‌ ఆడి వచ్చాడు. హామిల్టన్‌ మ్యాచ్‌కు దూరమైన మ్యాట్‌ హెన్రీ తిరిగి జట్టులో చేరాడు. లేథమ్‌, డరిల్‌ మిచెల్‌, నికోల్స్‌, ఫిలిప్స్‌, నాథన్‌ స్మిత్‌ టెస్టుల సాధన కోసం వెలింగ్టన్‌ వెళ్లారు. పిక్క గాయంతో ఫెర్గూసన్‌ ఆడటం లేదు.

బే ఓవల్‌లో రెండు మ్యాచ్‌లకూ టికెట్లన్నీ అమ్ముడయ్యాయని న్యూజిలాండ్‌ క్రికెట్‌ బోర్డు తెలిపింది. ఈ పర్యటనలో పది మ్యాచ్‌లకు గాను ఏడు నిండిపోయాయి. 2019 భారత పర్యటనలో ఎనిమిదింట నాలుగే నిండాయి.

తర్వాత టెస్టులు.. దోహా

లేథమ్‌ సారథ్యంలో కివీస్‌ టెస్టు జట్టును బుధవారం ప్రకటించారు. తొలి టెస్టు నవంబరు 19 నుంచి వెలింగ్టన్‌లో జరుగుతుంది. రెండోది నవంబరు 27 నుంచి క్రైస్ట్‌చర్చ్‌లో. తిలక్‌ మాత్రం దోహా వెళ్తాడు. రైజింగ్‌ స్టార్స్‌ ఆసియా కప్‌లో భారత్‌-ఎ జట్టుకు అతడే కెప్టెన్‌. నవంబరు 20న నేపాల్‌తో, 22న పాకిస్థాన్‌-ఎతో భారత్‌-ఎ తలపడుతుంది.