గ్రామీణ బ్యాంకు ఆఫీసర్‌ కాల్‌ లెటర్లు విడుదల.. తెలుగు రాష్ట్రాల్లో 560 పోస్టులు

హైదరాబాద్‌: ప్రాంతీయ గ్రామీణ బ్యాంకుల్లో ఆఫీసర్‌ పోస్టులకు దరఖాస్తు చేసిన అభ్యర్థులకు కాల్‌ లెటర్లు వచ్చేశాయి. ఆఫీసర్‌ స్కేల్‌-1 ఆన్‌లైన్‌ ప్రిలిమినరీ పరీక్ష కాల్‌ లెటర్లను ఐబీపీఎస్‌ సోమవారం (నవంబరు 9) వెబ్‌సైట్‌లో ఉంచింది. నవంబరు 22 వరకు వీటిని డౌన్‌లోడ్‌ చేసుకోవచ్చు.

ఈ నియామక ప్రక్రియలో దేశవ్యాప్తంగా 4,256 ఆఫీసర్‌ స్కేల్‌-1 పోస్టులు ఉన్నాయి. ఆంధ్రప్రదేశ్‌ గ్రామీణ బ్యాంకులో 400, తెలంగాణ గ్రామీణ బ్యాంకులో 160 ఉన్నాయి. గుజరాత్‌ (600), ఉత్తర్‌ప్రదేశ్‌ (425) తర్వాత ఎక్కువ పోస్టులు ఏపీలోనే. సెప్టెంబరు 25న సవరించిన ఈ సంఖ్యలు సూచనప్రాయమేనని ఐబీపీఎస్‌ తెలిపింది. బ్యాంకులు తెలిపే వాస్తవ ఖాళీల మేరకే కేటాయింపు ఉంటుంది. దరఖాస్తుల గడువు సెప్టెంబరు 27తో ముగిసింది.

ఏపీలో జనరల్‌ 162, ఓబీసీ 108, ఎస్సీ 60, ఎస్టీ 30, ఈడబ్ల్యూఎస్‌ 40 పోస్టులు ఉన్నాయి. తెలంగాణలో జనరల్‌ 65, ఓబీసీ 43, ఎస్సీ 24, ఎస్టీ 12, ఈడబ్ల్యూఎస్‌ 16 ఉన్నాయి.

45 నిమిషాలు.. 80 ప్రశ్నలు

ఐబీపీఎస్‌ పరీక్షల క్యాలెండర్‌ ప్రకారం ప్రిలిమినరీ పరీక్ష నవంబరు 21, 22 తేదీల్లో ఉంది. అభ్యర్థి పరీక్ష తేదీ, రిపోర్టింగ్‌ సమయం, కేంద్రం చిరునామా కాల్‌ లెటర్‌పై ఉంటాయి.

రీజనింగ్‌లో 40 ప్రశ్నలకు 25 నిమిషాలు, క్వాంటిటేటివ్‌ ఆప్టిట్యూడ్‌లో 40 ప్రశ్నలకు 20 నిమిషాలు ఇస్తారు. మొత్తం 80 మార్కులు. రెండు విభాగాల్లోనూ కటాఫ్‌ దాటాలి. తప్పు సమాధానానికి ఆ ప్రశ్న మార్కుల్లో నాలుగో వంతు కోత పడుతుంది. ఏపీ అభ్యర్థులకు ఇంగ్లిష్‌, హిందీ, తెలుగులో ప్రశ్నపత్రం ఉంటుంది. తెలంగాణలో ఉర్దూలోనూ ఉంటుంది. ప్రవేశం, తనిఖీలతో కలిపి కేంద్రంలో సుమారు 110 నిమిషాలు పడుతుందని ఐబీపీఎస్‌ తెలిపింది.

ఏపీలో 13 పరీక్ష కేంద్రాలు ఉన్నాయి. అవి విజయనగరం, విశాఖపట్నం, కాకినాడ, రాజమహేంద్రవరం, విజయవాడ, గుంటూరు, చీరాల, ఒంగోలు, నెల్లూరు, తిరుపతి, కడప, కర్నూలు, అనంతపురం. తెలంగాణలో హైదరాబాద్‌, కరీంనగర్‌, ఖమ్మం, వరంగల్‌లో ఉన్నాయి.

వెంట తీసుకెళ్లాల్సినవి

ibps.in వెబ్‌సైట్‌లోని సీఆర్‌పీ ఆర్‌ఆర్‌బీ-15 పేజీలో కాల్‌ లెటర్‌ లింక్‌ ఉంది. రిజిస్ట్రేషన్‌ నంబరు లేదా రోల్‌ నంబరు, పాస్‌వర్డ్‌ లేదా పుట్టిన తేదీతో లాగిన్‌ కావాలి.

కాల్‌ లెటర్‌పై పాస్‌పోర్టు సైజు ఫొటో అతికించాలి. అదే ఫొటో మరొకటి, ఒరిజినల్‌ ఫొటో గుర్తింపు కార్డు, దాని నకలు వెంట తీసుకెళ్లాలి. పాస్‌పోర్టు, పాన్‌ కార్డు, ఓటరు కార్డు, శాశ్వత డ్రైవింగ్‌ లైసెన్సు, ఫొటో ఉన్న ఆధార్‌ కార్డు చెల్లుతాయి. రేషన్‌ కార్డు, లెర్నర్స్‌ లైసెన్సు చెల్లవు. స్టాంపు వేసిన కాల్‌ లెటర్‌ను భద్రంగా ఉంచుకోవాలి. మెయిన్స్‌కు ఎంపికైతే దాన్ని మళ్లీ చూపాలి. సెల్‌ఫోన్లు, వాచీలు, క్యాలిక్యులేటర్లు, లోహ వస్తువులను అనుమతించరు.

ఆఫీసర్‌ స్కేల్‌-1 మెయిన్స్‌ డిసెంబరు 20న ఉంది. ఇంటర్వ్యూలు 2027 జనవరి లేదా ఫిబ్రవరిలో జరుగుతాయి. ఏపీలో 900, తెలంగాణలో 750 ఆఫీస్‌ అసిస్టెంట్‌ పోస్టులకు ప్రిలిమినరీ పరీక్ష డిసెంబరు 6, 12, 13 తేదీల్లో ఉంది. ఆ కాల్‌ లెటర్లు నవంబరు 10 నాటికి విడుదల కాలేదు.