రేషన్ డీలర్ల బకాయిలు: గోదాముల్లో రూ.600 కోట్ల బియ్యం పాడవుతోంది, అమ్మి డీలర్లకు చెల్లించాలన్న హరీశ్ రావు

రేషన్ డీలర్ల సమస్యలపై మాజీ మంత్రి, సిద్దిపేట ఎమ్మెల్యే టి. హరీశ్ రావు రాష్ట్ర ప్రభుత్వంపై విమర్శలు చేశారు. సిద్దిపేట జిల్లా గజ్వేల్ సమీపంలోని ప్రజ్ఞాపూర్‌లో అక్టోబర్ 27న జరిగిన తెలంగాణ రేషన్ డీలర్ల సంఘం రాష్ట్ర స్థాయి సమావేశానికి ఆయన ముఖ్య అతిథిగా హాజరయ్యారు.

సన్న బియ్యం పంపిణీ మొదలైన తర్వాత మిగిలిపోయిన సుమారు రూ.600 కోట్ల విలువైన దొడ్డు బియ్యం 16 నెలలుగా గోదాములు, రేషన్ దుకాణాల్లోనే ఉండిపోయిందని, దాన్ని పురుగులు, ఎలుకలు తినేస్తున్నాయని హరీశ్ ఆరోపించారు. ఆ బియ్యాన్ని ఎప్పుడో వేలం వేయాల్సిందని, కనీసం ఇప్పుడైనా అమ్మి డీలర్ల బకాయిలు చెల్లించాలని సూచించారు. ప్రభుత్వ నిర్ణయాల వల్ల పౌరసరఫరాల సంస్థ రూ.లక్ష కోట్ల అప్పుల్లో కూరుకుపోయిందని అన్నారు.

రేషన్ డీలర్ల హామీలు ఏమయ్యాయి

రాష్ట్రంలోని 17,200 మంది డీలర్లకు నెలకు సుమారు రూ.10 కోట్లు సరిపోతాయని హరీశ్ చెప్పారు. ముఖ్యమంత్రి క్యాంపు కార్యాలయానికి రూ.100 కోట్లు, దాని ప్రహరీ గోడకు రూ.18 కోట్లు ఖర్చు పెడుతున్న ప్రభుత్వం డీలర్లను పట్టించుకోవడం లేదని విమర్శించారు. నెలకు రూ.5,000 గౌరవ వేతనం, క్వింటాల్‌కు రూ.300 కమిషన్, రేషన్ దుకాణాలను మినీ సూపర్ మార్కెట్లుగా మార్చడం వంటి కాంగ్రెస్ హామీలు దాదాపు మూడేళ్లయినా అమలు కాలేదన్నారు. బీఆర్ఎస్ హయాంలో కమిషన్‌ను క్వింటాల్‌కు రూ.140కి పెంచామని గుర్తుచేశారు.

మూడేళ్లుగా సంఘం అధ్యక్షుడికి పౌరసరఫరాల మంత్రి ఉత్తమ్ కుమార్ రెడ్డి గానీ, కమిషనర్ గానీ కలిసే అవకాశం ఇవ్వలేదని హరీశ్ ఆరోపించారు. డీలర్ల సమస్యను శాసనసభ, శాసనమండలిలో లేవనెత్తుతామని చెప్పారు.

పెండింగ్ బిల్లుల కోసం చనిపోవడానికైనా సిద్ధమని జడ్చర్ల కాంగ్రెస్ ఎమ్మెల్యే అనిరుధ్ రెడ్డి చేసిన వ్యాఖ్యలను ఆయన ప్రస్తావించారు. ఆమరణ దీక్షకైనా సిద్ధమని సంఘం అధ్యక్షుడు నాయికోటి రాజు అదే వేదికపై ప్రకటించారు. “చచ్చిపోతేనే బిల్లులు వస్తాయా? ఎవరూ చచ్చిపోవద్దు. అందరం కలిసి గట్టిగా కొట్లాడి బిల్లులు, డీలర్ల కమిషన్ సాధించుకుందాం” అని హరీశ్ డీలర్లకు పిలుపునిచ్చారు.