Original bilingual journalism · English & తెలుగు
2026 అక్టోబర్ 16న థియేటర్లలోకి వచ్చిన ‘క్రేజీ కళ్యాణం‘ రచయిత–దర్శకుడు బద్రప్ప గాజుల తొలి చిత్రం. యారో సినిమాస్ పతాకంపై బూసం జగన్ మోహన్ రెడ్డి నిర్మించారు. తెలంగాణ పల్లెటూరి నేపథ్యంలో, కూతుళ్ల పెళ్లిళ్ల గురించి ఆరాటపడే ఓ తండ్రి కథ ఇది. అనుపమ పరమేశ్వరన్, నరేశ్, తరుణ్ భాస్కర్, అఖిల్ రాజ్ ఉద్దెమారి ప్రధాన పాత్రల్లో నటించారు. క్రేజీ కళ్యాణం రివ్యూ ఒక్క మాటలో: మంచి కథాంశం, నరేశ్ చక్కని నటన ఉన్న నిజాయితీ గల కుటుంబ చిత్రం; కానీ కథనం పెద్దగా ఆశ్చర్యపరచదు.
కథ, కథనం
ఎమ్మెస్సీ చదివిన కీర్తి (అనుపమ) ప్రభుత్వ ఉద్యోగం సాధించి తన కాళ్లపై తాను నిలబడాలనుకుంటుంది. ఆమె తండ్రి పర్వతాలు (నరేశ్) మాత్రం తగిన సంబంధం చూసి ఆమెకు పెళ్లి చేయాలని తపిస్తాడు. కీర్తి మనసు మాత్రం పెద్దగా ఆస్తిపాస్తులు లేని చేనేత కార్మికుడు ఉదయ్ (అఖిల్ రాజ్) మీద ఉంటుంది. ఈ కథాంశం ప్రేక్షకులకు దగ్గరగా ఉంటుంది; ఆడపిల్లలు సొంతంగా నిలబడాలన్న సందేశం చెప్పదగ్గదే. సమస్యల్లా ఈ ఆలోచనను కథనం పెద్దగా ముందుకు తీసుకెళ్లకపోవడమే. ప్రథమార్ధం సరదాగా సాగినా కథ ఊపందుకోవడానికి చాలా సమయం పడుతుంది; కొన్ని నిమిషాల్లోనే అర్థమయ్యే ఇంటి వాతావరణం మీదే ఎక్కువసేపు గడుపుతుంది. సినిమాలోని మెరుగైన భావోద్వేగ ఘట్టాలు ద్వితీయార్ధంలోనే ఉన్నా, అవసరానికి మించి సాగిన పెళ్లి ఘట్టం వాటి ప్రభావాన్ని పలుచన చేస్తుంది. మధ్యలో వచ్చే ఉపకథలు కాస్త రంగు అద్దుతాయే తప్ప కథకు బలాన్నివ్వవు; కథ కూడా మనం ఊహించిన దారిలోనే దాదాపు అడుగడుగునా నడుస్తుంది.
దర్శకత్వం
బద్రప్ప గాజుల ఉద్దేశం నిజాయితీతో కూడినది. పల్లెటూరి ఇంటి వాతావరణాన్ని ఆయన బాగా పట్టుకున్నారు: ఇరుగుపొరుగు గుసగుసలు, బంధువుల హడావుడి, ప్రతి సంబంధం చుట్టూ ఉండే ఆరాటం. తడబాటంతా అమలులోనే. అసలు సమస్య సమతుల్యత. భావోద్వేగంగా పండాల్సిన సన్నివేశాల్లోకి హాస్యం పదే పదే చొరబడటంతో రెండింటికీ కావలసినంత చోటు దక్కలేదు; మరింత బిగువైన స్క్రిప్ట్ ఉంటే దర్శకుడికి బాగా కలిసొచ్చేది. చివరి నిమిషాల్లో వచ్చే అనుకూలమైన మలుపు చిక్కుముడులను మరీ సులువుగా విప్పేస్తుంది. బాధ్యత గురించి మాట్లాడే సినిమాలో మద్యపాన సన్నివేశాలను అంత సరదాగా చూపడం కూడా అతకలేదు.
నటీనటులు
‘క్రేజీ కళ్యాణం‘లో అన్నింటికంటే బలమైన అంశం నరేశ్. ఆందోళన చెందే తండ్రిగా హాస్యం నుంచి భావోద్వేగానికి ఆయన సునాయాసంగా మారారు; ముఖ్యంగా పెళ్లి ఘట్టంలో, క్లైమాక్స్‌లో చాలాసేపు సినిమాను భుజాన మోశారు. అనుపమ పరమేశ్వరన్ సహజమైన, నేలవిడవని నటనతో సొంత ఆశయాలున్న పల్లెటూరి అమ్మాయిగా నమ్మకంగా కనిపిస్తారు; అయితే ఆమె ప్రతిభకు తగ్గ లోతు కీర్తి పాత్ర రచనలో లేదు. తరుణ్ భాస్కర్ కొన్ని నవ్వులు పంచుతారు, కానీ ఆయన పాత్ర ఒకే రకమైన హాస్యాన్ని పదే పదే నమ్ముకుంటుంది, పూర్తిగా తీర్చిదిద్దినట్టు అనిపించదు. పెద్దగా మెరుపు లేని ప్రేమకథలో అఖిల్ రాజ్ ఫరవాలేదనిపించారు.
సంగీతం
సురేశ్ బొబ్బిలి పాటలు, నేపథ్య సంగీతం ఈ సినిమా బలాల్లో ఒకటి. సంగీతం గ్రామీణ వాతావరణానికి తగినట్టు ఉండి, కథకు అడ్డు రాకుండా కొన్ని భావోద్వేగ సన్నివేశాలకు బలాన్నిస్తుంది. అయితే పాటలు తరచుగా రావడంతో అసలే నెమ్మదిగా సాగే సినిమా మరింత మందగిస్తుంది.
సాంకేతిక విభాగాలు
శ్యామ్ దూపాటి ఛాయాగ్రహణం చక్కగా, పల్లె వాతావరణానికి తగ్గట్టు ఉంది. శ్రవణ్ కటికనేని ఎడిటింగ్ బలహీనమైన అంశం: ముఖ్యంగా ద్వితీయార్ధంలో, గంభీరమైన క్షణాలకు హాస్యం అడ్డుపడే చోట్ల కత్తెర మరింత పదునుగా ఉండాల్సింది.
క్రేజీ కళ్యాణం రివ్యూ: తీర్పు
సజీవమైన తండ్రి పాత్ర కేంద్రంగా సాగే మంచి ఉద్దేశం గల కుటుంబ చిత్రం ‘క్రేజీ కళ్యాణం‘. కానీ ఊహించగల కథనం, నెమ్మదైన నడక, అసమతుల్యమైన స్వరం దీన్ని సాధారణ చిత్రంగానే మిగిల్చాయి. పల్లెటూరి పెళ్లి వినోద చిత్రాలను ఇష్టపడే కుటుంబాలకు, నరేశ్ అభిమానులకు ఒకసారి చూడడానికి సరిపడా అంశాలున్నాయి. చాలామంది ప్రేక్షకులకు ఇది థియేటర్‌కు వెళ్లి చూడాల్సిన సినిమా కంటే ఓటీటీలో చూసుకోదగ్గ సినిమా.
స్కోప్ వెర్డిక్ట్: 2.25/5. సగటు కంటే తక్కువ; చూడాలనుకుంటే ఓటీటీలో చూసుకోవడమే మేలు.
ఇవి కూడా చదవండి: Garividi Lakshmi Review: గరివిడి లక్ష్మి — ఆనంది నటన మెరిసిన నిజాయితీ బయోపిక్, కథనం మాత్రం సాదాసీదా · Comrade Kalyan Review: కామ్రేడ్ కళ్యాణ్ — సరదా మొదలు, సాగదీసిన ముగింపు
