రంజీ ట్రోఫీ: ఆఖరి జోడీ 39 పరుగులు.. ఛత్తీస్‌గఢ్‌పై ఒక వికెట్ తేడాతో హైదరాబాద్ గెలుపు, గ్రూప్-బిలో అగ్రస్థానం; ఆంధ్రను కాపాడిన రషీద్ 176

లక్ష్యం 259. స్కోరు 220/9. గెలవాలంటే ఇంకా 39 పరుగులు కావాలి, చేతిలో ఒకే వికెట్. ఈ దశలో అనికేత్ రెడ్డి, రక్షణ్ రెడ్డి పట్టు వదలకుండా ఆడి జట్టును గట్టెక్కించారు. జింఖానా మైదానంలో నవంబర్ 5 గురువారం ముగిసిన రంజీ ట్రోఫీ ఎలైట్ గ్రూప్–బి మ్యాచ్‌లో హైదరాబాద్ ఒక వికెట్ తేడాతో ఛత్తీస్‌గఢ్‌ను ఓడించింది. ఆఫ్ స్పిన్నర్ జయంత్ యాదవ్ బౌలింగ్‌లో సిక్సర్ బాది రక్షణ్ మ్యాచ్‌ను ముగించాడు.

ఈ సీజన్‌లో నాలుగు మ్యాచ్‌లు ఆడిన హైదరాబాద్‌కు ఇది మూడో విజయం. 20 పాయింట్లతో జట్టు గ్రూప్–బిలో అగ్రస్థానానికి చేరింది. ఛత్తీస్‌గఢ్ ఖాతాలో ఏడు పాయింట్లే ఉన్నాయి.

నిలబెట్టిన అభిరథ్, వరుణ్

ఓవర్‌నైట్ స్కోరు 13/2తో చివరి రోజు బరిలోకి దిగిన హైదరాబాద్‌ను ఓపెనర్ అభిరథ్ రెడ్డి (68) ఆదుకున్నాడు. రాహుల్ రాదేశ్ (39)తో కలిసి మూడో వికెట్‌కు 87 పరుగులు జోడించాడు. ఆ తర్వాత వికెట్లు వరుసగా పడటంతో స్కోరు 142/6కు చేరింది. వరుణ్ గౌడ్ (55), కెప్టెన్ చామ మిలింద్ (22) ఏడో వికెట్‌కు 40 పరుగులు జత చేశారు. మరో రెండు వికెట్లు పడ్డాక పదో నంబర్ బ్యాటర్ అనికేత్, రక్షణ్ మిగతా పని పూర్తి చేశారు. అజయ్ మండల్ బౌలింగ్‌లో అనికేత్ రెండు సిక్సర్లు బాదాడు.

తొలి ఇన్నింగ్స్‌లో ఛత్తీస్‌గఢ్ 284, హైదరాబాద్ 280 పరుగులు చేశాయి. రెండో ఇన్నింగ్స్‌లో మయాంక్ వర్మ (81) రాణించడంతో ఛత్తీస్‌గఢ్ 254 పరుగులు చేసింది. హైదరాబాద్ బౌలర్లలో రక్షణ్, అనికేత్ చెరో మూడు వికెట్లు తీశారు.

ఆంధ్రను కాపాడిన రషీద్

పంజాబ్‌తో ఆంధ్ర ఆడిన మ్యాచ్ డ్రాగా ముగిసింది. పంజాబ్ 592/9 స్కోరుకు జవాబుగా ఆంధ్ర 505/8 పరుగులు చేసింది. షేక్ రషీద్ 176 పరుగులు సాధించగా, కరణ్ షిండే 96 వద్ద ఔటై నాలుగు పరుగుల తేడాతో సెంచరీ చేజార్చుకున్నాడు. సయ్యద్ ముస్తాక్ అలీ టీ20 టోర్నీ కోసం రంజీకి ఇప్పుడు విరామం. జనవరిలో మ్యాచ్‌లు తిరిగి మొదలవుతాయి.