యూపీఐపై ఎండీఆర్ వేస్తే డిజిటల్ చెల్లింపులు తగ్గిస్తాం: 45-53% వీధి వ్యాపారుల మాట, ఐఎస్‌బీ అధ్యయనం

యూపీఐ లావాదేవీలపై మర్చంట్ డిస్కౌంట్ రేట్ (ఎండీఆర్) అమల్లోకి వస్తే డిజిటల్ చెల్లింపులను తగ్గించుకుంటామని 45 నుంచి 53 శాతం వీధి వ్యాపారులు చెప్పారని ఐఎస్‌బీ అధ్యయనం వెల్లడించింది. హైదరాబాద్‌లోని ఇండియన్ స్కూల్ ఆఫ్ బిజినెస్‌కు చెందిన సెంటర్ ఫర్ అనలిటికల్ ఫైనాన్స్ (సీఏఎఫ్) ఈ సర్వే చేపట్టింది.

14 రాష్ట్రాలు, కేంద్రపాలిత ప్రాంతాల్లోని 64 పట్టణ స్థానిక సంస్థల పరిధిలో 722 మంది వ్యాపారులను సీఏఎఫ్ ప్రశ్నించింది. యూపీఐ ద్వారా డబ్బు తీసుకునే వారిలో 64 శాతం మందికి కొత్త చార్జీ గురించి తెలుసు. యూపీఐ వాడని వారిలో ఆ సంఖ్య 26 శాతమే. దాదాపు 70 శాతం మంది సరఫరాదారులకు ఒక్కసారికి రూ.2,000కు మించి చెల్లిస్తున్నారు.

సరఫరాదారుల నుంచే అదనపు వసూళ్లు

సర్వేకు ముందు పది రోజుల్లో యూపీఐ చెల్లింపులకు అదనంగా కట్టాలని సరఫరాదారులు అడిగారని 10.4 శాతం మంది తెలిపారు. ఆ భారం పడిన వారిలో 30.8 శాతం మంది దాన్ని కొనుగోలుదారులపైనే వేస్తామన్నారు. దేశమంతా అమలు చేసే ముందు కొన్ని చోట్ల ప్రయోగాత్మకంగా పరిశీలించాలని, యూపీఐ నిర్వహణ ఖర్చులపై స్వతంత్ర సమీక్ష జరపాలని సీఏఎఫ్ సూచించింది.

ఎన్‌పీసీఐ నిబంధనల ప్రకారం రూ.2,000 దాటిన వ్యాపార చెల్లింపులపై 0.4 శాతం ఎండీఆర్ ఉంటుంది. దీన్ని కొనుగోలుదారు కాదు, వ్యాపారే భరించాలి. క్యూఆర్ కోడ్ ద్వారా నెలకు రూ.1 లక్ష వరకు అందుకునే చిన్న వ్యాపారులకు మినహాయింపు ఉంది. అక్టోబర్ 15 నుంచి అమలు కావాల్సిన ఈ చార్జీని పండుగల దృష్ట్యా ఎన్‌పీసీఐ వాయిదా వేసింది. దీపావళి తర్వాత కొత్త తేదీని ప్రకటిస్తామని తెలిపింది.