హుస్సేన్‌సాగర్ దారులు దుర్గమ్మ విగ్రహాలకే: అక్టోబర్ 24 ఉదయం 6 వరకు మళ్లింపులు ఇవే

దుర్గామాత విగ్రహాల ఊరేగింపుల కోసం హుస్సేన్‌సాగర్ చుట్టూ పలు రహదారులను ప్రత్యేకించడంతో ఖైరతాబాద్, సచివాలయం, ట్యాంక్‌బండ్ మీదుగా రాకపోకలు సాగించేవారు అక్టోబర్ 24 శనివారం ఉదయం 6 గంటల వరకు చుట్టుదారులు తప్పవు. పీపుల్స్ ప్లాజా, గార్డెన్ పాయింట్‌తో పాటు జలవిహార్, సంజీవయ్య పార్క్‌ల వద్ద ఏర్పాటు చేసిన కృత్రిమ కొలనుల్లో నిమజ్జనాల కోసం హైదరాబాద్ ట్రాఫిక్ పోలీసులు అక్టోబర్ 21 మధ్యాహ్నం 3 గంటల నుంచి మళ్లింపులు అమలు చేస్తున్నారు. రద్దీని బట్టి ఆంక్షలు విధిస్తామని పోలీసులు తెలిపారు.

ఎక్కడ ఏ మళ్లింపు

• వీవీ విగ్రహం: పంజాగుట్ట, రాజ్‌భవన్ రోడ్డు నుంచి ఖైరతాబాద్ ఫ్లైఓవర్ వైపు వచ్చే వాహనాలను నిరంకారి జంక్షన్ వైపు పంపుతారు. ముందుకు విగ్రహాల వాహనాలకే అనుమతి.
• పాత సైఫాబాద్ పోలీస్ స్టేషన్: నిరంకారి నుంచి ఇక్బాల్ మినార్ వైపు వెళ్లే వాహనాలు రవీంద్రభారతి, మాసాబ్‌ట్యాంక్ వైపు మళ్లుతాయి.
• ఇక్బాల్ మినార్: సచివాలయం వైపు వెళ్లే ట్రాఫిక్‌ను తెలంగాణ తల్లి ఫ్లైఓవర్ మీదుగా లోయర్ ట్యాంక్‌బండ్‌కు పంపుతారు.
• ప్రింటింగ్ ప్రెస్ జంక్షన్: బడా గణేశ్ లేన్, మింట్ కాంపౌండ్ నుంచి నెక్లెస్ రోటరీ వైపు వాహనాలను అనుమతించరు. వాటిని మింట్ కాంపౌండ్, రాజీవ్ గాంధీ విగ్రహం వైపు తిప్పుతారు.
• పాత అంబేడ్కర్ విగ్రహం: అప్పర్ ట్యాంక్‌బండ్ నుంచి సచివాలయం వైపు వచ్చే వాహనాలు లిబర్టీ వైపు, లిబర్టీ నుంచి వచ్చేవి అప్పర్ ట్యాంక్‌బండ్ వైపు మళ్లుతాయి. ఇక్కడి నుంచి సచివాలయం జంక్షన్, ఎన్టీఆర్ మార్గ్ మీదుగా నెక్లెస్ రోడ్డు వరకు విగ్రహాల వాహనాలకే దారి.
• సోనాబీ అబ్దుల్లా మసీదు: అప్పర్ ట్యాంక్‌బండ్ నుంచి నల్లగుట్ట వంతెన, పీవీ మార్గ్ వైపు వెళ్లేవారిని కర్బలా, రాణిగంజ్ మీదుగా మినిస్టర్ రోడ్డుకు పంపుతారు. రాణిగంజ్, మినిస్టర్ రోడ్డు నుంచి నెక్లెస్ రోడ్డు వైపు వచ్చే వాహనాలను నల్లగుట్ట ఎక్స్ రోడ్స్ వద్ద వెనక్కి తిప్పుతారు.

ఆంక్షలు ముగిసే వరకు వీవీ విగ్రహం, పాత సైఫాబాద్ పోలీస్ స్టేషన్, రవీంద్రభారతి, లిబర్టీ, అప్పర్ ట్యాంక్‌బండ్, నల్లగుట్ట ఎక్స్ రోడ్స్ వైపు వీలైనంత వరకు రాకుండా ప్రత్యామ్నాయ దారుల్లో వెళ్లాలని పోలీసులు వాహనదారులకు సూచించారు.